Jambyl oblysynyń ákimi mektep oqýshylaryna arheolog mamandyǵyn tańdaýǵa keńes berdi
TARAZ. QazAqparat - Jambyl oblysynyń ákimi Kárim Kókirekbaevtiń daryndy oqýshylarmen, halyqaralyq konkýrstardyń, respýblıkalyq olımpıadalar men ǵylymı jobalar jeńimpazdarymen dástúrli kezdesýi ótti, dep habarlaıdy «QazAqparat» HAA tilshisi Jambyl oblysy ákimdiginiń baspasóz qyzmetine silteme jasap.
Halyqaralyq jáne respýblıkalyq olımpıadalar men ǵylymı jobalar konkýrstarynda jetistikke jetken 85 daryndy oqýshy aımaq basshysymen kezdesip, mamandyq tańdaý jóninde keńes suraý múmkindigine ıe boldy.
«Men senderdiń jetistikterińmen maqtanamyn, - dedi aımaq basshysy. - Senderdiń kópshilikteriń ǵylym salasyndaǵy maqtanyshymyzǵa aınalyp, memleketimizdi álemge tanytatyndyqtaryńa senemin. Bul zalda kileń daryndy jastar jınalǵan. Senderdeı bilimdi jastardy tárbıelegen ata-analar men ustazdarǵa alǵysymdy bildirgim keledi».
Kezdesý barysynda oblys ákimi Qazaqstan jastarynyń negizgi maqsattaryn atap ótip, qazirgi bilim keńistiginde ár saladan habardar bolý - ómirlik jetistikke jetýdiń negizgi kilti ekendigin jetkizdi.
Mamandyq tańdaý máselesine kelgende, Qazaqstanda arheolog mamandyǵynyń bolashaǵy zor ekendigin málimdegen aımaq basshysy, mektep oqýshylaryna osy mamandyqty tańdaýǵa keńes berdi. Al sheteldik joǵary oqý oryndaryna bilim alýdy josparlaǵan oqýshylar týǵan qalalary - Tarazdy umytpaýlary tıistigin qadap aıtty. Bul sózderin tipti, aǵylshyn tilinde jetkizdi.
Kezdesýden keıin oblys ákimi oqýshylardyń bolashaǵyna jemis tilep, bir-bir noýtbýktan syılady, al olardyń ustazdaryna maqtaý gramotalary tabys etildi.
Oblys ákimdigi baspasóz qyzmetiniń málimdeýinshe, Jambyl oblysynyń 222 oqýshysy halyqaralyq olımpıadalar men ǵylymı jobalar konkýrstaryna qatysqan. Olardyń 114-i jeńimpazdar atandy - 17 altyn, 32 kúmis jáne 65 qola júlde.
