Jambyl oblysynyń ákimi daýys berdi

TARAZ. QazAqparat - Jambyl oblys ákimi Asqar Myrzahmetov QR Prezıdentiniń kezekten tys saılaýynda óz tańdaýyn jasady, dep habarlaıdy QazAqparat tilshisi.

Óńir basshysy Taraz qalasy Jambyl Jabaev atyndaǵy №5 mektep-gımnazııasynda ornalasqan 35 saılaý ýchaskesine kelip daýys berdi. Atalmysh saılaý ýchaskesi tańǵy jetiden bastap óz jumysyn bastaǵan. Onda barlyǵy 2308 saılaýshy tirkelgen. Olardyń 400-ge jýyǵy saǵat 11:00-ge deıin óz tańdaýyn jasap úlgerdi. Bul saılaý ýchaskesinde kelýshilerge arnalyp barlyq jaǵdaı jasalǵan. Daýys berýshilerge merekelik kóńil-kúı syılaý úshin ásem áýen oınatylyp turǵany da kóńilge ádemi áser syılaıdy. Al alǵashqy bolyp daýys bergenderge estelik syılyqtar da tartý etilip jatyr.

Aıta keteıik, Jambyl oblysy boıynsha kezekten tys prezıdenttik saılaýǵa 718 myńǵa jýyq daýys berýshi tirkelgen. Onyń 40 myńǵa jýyǵy múmkindigi shekteýli azamattar. Saıası naýqanda óńirde barlyǵy 484 saılaý ýchaskesi jumys isteýde.