Jambyl oblysynyń ákimi daýyldan keıingi shyǵyndy jarııalady
ASTANA. QazAqparat - Úkimettiń búginigi otyrysynda beınebaılanysqa shyqqan Jambyl oblysynyń ákimi Kárim Kókirekbaev qatty daýyldyń saldary boıynsha baıandap, shyǵynnyń kólemin jarııalady. Onyń aıtýynsha, kommýnaldyq nysandarǵa qatysty barlyq shyǵyndar jergilikti bıýdjettiń esebinen óteledi, dep xabarlaıdy QazAqparat tilshisi Úkimet úıinen.
Ákimniń sózine qaraǵanda, daýyldan keıin 36 adam medıtsınalyq kómekke júginip, tórteýi aýrýxanaǵa jatqyzyldy. «Tótenshe jaǵdaı Tarazda, Baızaq, Moıynqum men Shý aýdandarynda engizildi. Qazirgi kezde shyǵynnyń kólemi anyqtalýda. Aldyn ala boljamǵa sáıkes, shyǵyndar 400 mln. teńgeni qurap otyr», - deıdi Jambyl oblysynyń ákimi.
Ákimniń aıtýynsha, qorǵanys mınıstrligi, sondaı-aq bilim jáne ǵylym mınıstrligi ózine qarasty nysandardy óz kúshimen qalpyna keltiretin boldy. Al kommýnaldyq menshiktegi nysandardyń barlyǵy jergilikti bıýdjettiń esebinen óteledi.
Oǵan qosa, qatty daýyldyń saldarynan 10 jylyjaı buzyldy. Onyń shyǵyny 175 mln teńgeni qurap otyr. Atalǵan nysandar nesıege salynǵandyqtan ol aqshany qaıtarý merzimin uzartý týraly aýyzsha kelisim bar. Úkimet basshysy B.Saǵyntaev osy máseleni jiti baqylaýǵa alyp, «QazAgromen» tıisti jumysty júrgizýdi tapsyrdy.
