Jambyl oblysynyń ákimi bastaǵan bir top delegatsııa Jetisý jerine keldi
TALDYQORǴAN. QazAqparat - Jambyl oblysynyń ákimi Kárim Kókirekbaev bastaǵan bir top delegatsııa jumys saparymen Almaty oblysyna keldi. Mundaǵy maqsat kórshi óńirdiń áleýmettik-ekonomıkalyq damý saıasatymen tanysyp, ózara tájirbıe almasý, dep habarlaıdy QazAqparat tilshisi.
Jambyldyqtardy ásirese Jetisý jerinde qarqyn alǵan qant qyzylshasyn ósirý, óńdeý máseleleri qyzyqtyrdy. Qonaqtar tátti túbir ósirý tehnologııasymen tanysyp, Kóksý qant zaýytynyń jumysyna kóz júgirtti. Memlekettik jeke menshik seriktestik negizinde Almaty oblysy bıyl ekinshi qant zaýytyn iske qospaq. Bıyl óńir sharýalary 9 myń gektar jerge qant qyzylshasyn egip, 300 myń tonna ónim alýdy kózdep otyr. Eki oblys basshysy saýda-ekonomıkalyq, ǵylymı-tehnıkalyq, gýmanıtarlyq jáne basqa da salalardy júzege asyrý úshin yntymaqtastyq memorandýmyna qol qoıdy.
