Jambyl oblysynyń 80 jyldyǵyna Kenen Ázirbaevtyń eskertkishi ashyldy
TARAZ. QazAqparat – Jambyl oblysynyń 80 jyldyǵyna oraı Taraz qalasyndaǵy «Balasaǵun» ortalyq kontsert zalynyń aldyna Kenen Ázirbaevtyń eskertkishi qoıyldy,- dep habarlaıdy QazAqparat.
Qazaqtyń áıgili halyq aqyny, ánshi, kompozıtor, Qazaqstannyń eńbek sińirgen óner qaıratkeri Kenen Ázirbaevtyń eskertkishi «Balasaǵun» ortalyq kontsert zaly ǵımaratynyń aldyna ornatylǵan.
Kenen Ázirbaev - qazaq ónerindegi sal-serilik jáne aıtyskerlik dástúrlerdi úzbeı, HH ǵasyrdyń 70-jyldaryna deıin jetkizgen ónerpaz. Dastan janryn jastaıynan jyrlaǵan. Qazaq halqynyń aıtys óneriniń nasıhatshysy. 150-deı án tolǵap, ánderi halyq súıip aıtatyn máńgilik rýhanı qazynaǵa aınaldy. Kenen Ázirbaevqa bıyl - 135 jyl.
Dúldilge arnalǵan eskertkishti ashý qurmeti Qazaqstannyń eńbek sińirgen mádenıet qyzmetkeri, kúıshi-kompozıtor Ábdimomyn Jeldibaev pen Kenen ata urpaǵy Murat Kenenovke buıyrdy.
Saltanatty sharaǵa arnaıy qatysqan QR Mádenıet jáne sport mınıstri Aqtoty Raıymqulova men aımaq basshysy Asqar Myrzahmetov barsha jurtshylyq atynan eskertkishke gúl shoqtaryn qoıdy. Budan soń qonaqtar Qordaı aýdandyq K.Ázirbaev ádebı-memorıaldyq mýzeıi ázirlegen kórmeni tamashalady.
Aıta keteıik, jyr alyby – Jambyldyń janynda jarty ǵasyr ýaqyt júrip qazaq aýyz ádebıetiniń mol murasymen qanyqqan Kenen aty ult mádenıeti tarıhynda altyn árippen jazylǵan esim sanalady. Ótken jyly jyr dúldúliniń esimi oblystyq fılarmonııaǵa berilgen bolatyn. Sondyqtan da onyń eskertkishi dál osy oblystyq fılarmonııa turǵan «Balasaǵun» ortalyq kontsert zalynyń aldyna qoıylýy óte utymdy usynys bolyp otyr. Demeýshiler qarajaty esebinen salynǵan tas músindi músinshi Kóljigit Temirhan ázirlegen.
