Jambyl oblysynyń 6 eldi mekeninde sý basý qaýpi tómendedi
TARAZ. QazAqparat – Jambyldaǵy eldi mekender men sharýashylyq nysandaryn sý basý qaýpi Shý, Talas jáne Asa ózenderindegi sý deńgeıiniń kóterilýi saldarynan bolýy múmkin. Sondaı-aq taý bókterindegi erigen qar jáne jańbyr sýlary da halyq shoǵyrlanǵan aýyldarǵa qaýipti sanalady, dep habarlaıdy QazAqparat tilshisi.
Bul týraly óńirlik kommýnıkatsııalar qyzmetiniń aqparat alańynda ótken brıfıngte Jambyl oblysy TJ departamenti bastyǵynyń orynbasary Eraly Aqylbekov aıtyp berdi.
Spıkerdiń aıtýynsha, aımaq boıynsha kóktemgi merzimde sý basýy múmkin 38 eldi meken bar. Olardyń 28-i sý qoımalaryndaǵy sý deńgeıiniń kóterilýinen, al 10-ynda taý bókterinde erigen qar sýy nemese nóserli jańbyr saldarynan oryn alý yqtımaldylyǵy eskerilgen.
«Oblys kóleminde 156 gıdrotehnıkalyq qurylys nysandary ornalasqan. Onyń ishinde respýblıkalyq menshikte – 41, jeke menshikte – 9-y bar. «2017-2020 jyldarǵa arnalǵan sý tasqynynyń aldyn alý jáne joıý jónindegi is-sharalar kesheni» Jol kartasyna sáıkes júrgizilgen jumystar nátıjesinde 6 eldi mekende sý basý qaýpi tómendendi. Olardyń qatarynda Jambyl aýdanynyń Jasórken, Qyzylqaınar, Baızaq aýdanynyń Sarykemer, Densaýlyq saıajaıy, Talas aýdanynyń Aqkól jáne Úsharal aýyldary bar, — dedi E. Aqylbekov.
Aıta ketý kerek, Tarazdaǵy, Jambyl jáne Baızaq aýdandarynyń eldi mekenderinde sý basý qaýpiniń aldyn alý úshin Talas ózenindegi jaǵalaýdy nyǵaıtý jumystaryn júrgizýge respýblıkalyq bıýdjetten qarajat bólinbeýine baılanysty oryndalmady. Onyń jalpy uzyndyǵy 25,4 shaqyrymdy quraıdy. Brıfıng barysynda atalǵan jaǵalýdy jóndeý jumystary «2021-2023 jyldarǵa arnalǵan sý tasqynynyń aldyn alý jáne joıý jónindegi sharalar kesheni» jol kartasyna engizilgeni aıtyldy.
