Jambyl oblysynyń 10 dárigeri shetelde oqytylady

TARAZ. QazAqparat - Jambyl oblysynda medıtsınalyq qyzmetkerlerdiń biliktiligin, qyzmet sapasyn arttyrý úshin 1236 mamandy oqytýǵa 27,5 mıllıon teńge, 10 dárigerdi shetelde oqytýǵa 5,2 mıllıon teńge josparlanǵan, dep habarlaıdy QazAqparat tilshisi.

Bul týraly Jambyl oblysy ákiminiń birinshi orynbasary Nurjan Kalenderov óńirlik kommýnıkatsııalar qyzmetinde ótken brıfıngte málimdedi.

Al, salaǵa kelgen 67 mamandy qoldaý sharalaryna 53,6 mıllıon teńge bólinip, ár mamanǵa 800 myń teńgeden kótermeaqy tóleý qarastyrylǵan.

«Tegin medıtsınalyq kómektiń kepildik berilgen kólemimen qamtýǵa 3,5 mılıard teńge qaraldy. Onyń ishinde orfandyq aýrýlardy dári-dármekpen qamtamasyz etýge 638,8 mıllıon teńge, tselıakııa aýrýy dıagnozy qoıylǵan balalardyń glıýtensiz tamaqtanýy úshin ónimderin satyp alýǵa 19,5 mıllıon teńge baǵyttaldy. Azamattardy eldi mekennen tys jerlerde emdelý úshin tegin jáne jeńildetilgen jol júrýmen qamtamasyz etýge 36,5 mıllıon teńge qaraldy», – dedi oblys ákiminiń birinshi orynbasary Nurjan Kalenderov.

Aıta keteıik, buǵan deıin Jambyl aýrýhanalaryna 20 reanımobıl men 20 sanıtarlyq avtokólik alynatynyn jazǵan bolatynbyz.