Jambyl oblysyndaǵy jarylys kezinde joǵalǵan adam áli izdestirilip jatyr
TARAZ. QazAqparat –Jambyl oblysynyń ákimi Berdibek Saparbaev Tarazda ótken brıfıng barysynda Baızaq aýdanyndaǵy áskerı qoımalardaǵy jarylystardyń sebebin tergeý týraly baıandap berdi, dep habarlaıdy QazAqparat.
Aımaq basshysy 26 tamyzda 28349 áskerı bóliminiń aýmaǵynda bolǵan órt pen jarylystar kezinde 17 adam qaza taýyp, bir adam iz-túzsiz joǵalǵanyn atap ótti. Qaza bolǵandardyń arasynda tótenshe jaǵdaılar departamenti, prokýratýranyń ókilderi, áskerı qyzmetshiler bar.
«Tótenshe oqıǵa kezinde bir azamattyń iz-túzsiz joǵalǵanyn atap ótkim keledi. Alaıda ony izdeý jumystary áli de jalǵastyrylýda. Men «Ońtústik» aımaqtyq qolbasshylyǵymen únemi baılanystamyn. Sharaǵa qansha maman, tehnıka, saperler, qyzmettik ıtter jumyldyrylǵany týraly máselelerdi qadaǵalap júrmin. Іzdeý-barlaý sharalary jalǵasýda. Men joǵalǵan adamnyń ata-anasymen de baılanystamyn», - dedi Berdibek Saparbaev.
Tótenshe oqıǵa sebepterine toqtala ótken óńir basshysy bul máseleniń barlyǵyn mazalaıtynyn atap ótti.
«Memleket basshysynyń tapsyrmasymen Bas prokýratýra jáne Іshki ister mınıstrligi mamandarynan qurylǵan tergeý toby qurylǵan. Tergeý qorytyndylary aıaqtalǵan soń resmı túrde jarııa etiledi. Oqıǵanyń sebebi, sondaı-aq oǵan kináli bolǵandar sol kezde belgili bolady. Sondyqtan jerlesterimdi qandaı da bir teris aqparat jáne ósek-aıańǵa senbeýin suraımyn. Naqty aqparatty arnaıy qurylǵan shtabtan alýǵa bolady», - dep atap ótti B.Saparbaev.
Eske sala ketsek, Jambyl oblysy Baızaq aýdanynyndaǵy Qaınar aýylynyń janynda ornalasqan áskerı bólimdegi qoımalardyń biriniń janynda áýeli órt bastalyp, odan keıin birneshe jarylys bolǵan. Órttiń shyǵý sebepteri anyqtalýda.
Jambyl oblysyndaǵy jarylystan qaza bolǵandar sany 17 adamǵa jetti.
Qazaqstan Prezıdenti Qasym-Jomart Toqaev 29 tamyzdy Jalpyulttyq aza tutý kúni dep jarııalaǵan. Qazirgi kezde Baızaq aýdanynda qalpyna keltirý jumystary júrgizilýde.
Galına Skrıpnık
