Jambyl oblysyndaǵy jańa jaǵdaılar: Naýqas indetti poıyzda juqtyrǵan
TARAZ. QazAqparat - 7 sáýir kúni Jambyl oblysynda COVID-2019 juqtyrǵan taǵy 5 adam anyqtaldy, onyń tórteýi Qordaı aýdanynyń turǵyndary, dep habarlaıdy QazAqparat coronavirus2020.kz saıtyna silteme jasap.
«Aldyn ala málimet boıynsha, 1961, 1963, 1973 jáne 1985 jyly týǵan azamattardyń vırýs juqtyrýyna olarmen tyǵyz baılanysta bolǵan indetke shaldyqqan naýqas sebep bolǵan. Besinshi naýqas – 1966 jylǵy Moıynqum aýdanynyń turǵyny. 28 naýryz kúni «Kókshetaý-Qyzylorda» poıyzynda koronavırýs ınfektsııasyn juqtyrǵan adammen baılanysta bolǵan. Qyzylorda oblystyq sanıtarlyq-epıdemıologııalyq qyzmetinen osy aqparatty alǵannan soń, ol jedel túrde karantındik statsıonarǵa oqshaýlandyryldy. Laboratorııalyq taldaý COVID-2019 dıagnozyn rastady», - delingen aqparatta.
Málim etilgendeı, naýqastanǵan azamattarmen baılanysta bolǵan 54 adam anyqtalyp, karantınge jatqyzyldy.
«Laboratorııalyq zertteýge materıaldardy irikteý jumysy júrip jatyr. Sanıtarlyq-epıdemıologııalyq qyzmet indet juqtyrǵandar men baılanysta bolǵandardyń turǵylyqty mekenjaıy men barǵan jerlerine dezınfektsııa jasady», - delingen resmı habarlamada.
Jalpy Jambyl oblysynda koronavırýs indetin juqtyrýdyń 45 oqıǵasy tirkeldi. Onyń ishinde 11 adam shekara pýnktterinen ótken kezde anyqtalsa, 6 naýqas - Delıden kelgen reıs jolaýshylary. Tarazda – 5, Qordaı aýdanynda – 18, Merkide – 2, Shý, Jambyl jáne Moıynqum aýdandarynda 1 adamnan tirkeldi.
