Jambyl oblysyndaǵy jalǵyz balalar úıindegi tárbıelenýshiler sany azaıyp jatyr
«Qazirgi tańda Jambyl oblysynda tek bir ǵana balalar úıi - Q.Sarymoldaev atyndaǵy №1 balalar úıi ǵana jumys istep tur, - dedi «QazAqparat» HAA tilshisine oblystyq ákimdiktiń kámeletke tolmaǵandar jáne olardyń quqyqtaryn qorǵaý isi boıynsha komıssııanyń hatshysy Baqyt Jaqsylyqov. - 2012 jyldan bastap Tarazdaǵy «Ulan» balalar úıi men Merke aýdanyndaǵy V.Savva atyndaǵy mektep-ınternaty jabyldy».
Q.Sarymoldaev atyndaǵy balalar úıinde tárbıelenýshilerdiń ómiri men bilim alýyna barlyq jaǵdaı jasalǵan. Balalar kishisi de, úlkeni de bar «otbasylarǵa» birikken. Mundaı otbasynyń árqaısysy jeke blokta ómir súrip jatyr. Olardyń páterlerinde demalýǵa jáne sabaq oqýǵa arnalǵan bólmeleri, jatyn bólmesi men jýynatyn bólme bar. Blok zamanaýı tehnıkamen jabdyqtalǵan.
Balalar úıiniń ǵımaratynda murajaı, tigin tsehy, óner jáne qolóner kabıneti, kitaphana, kompıýter synyby bar. Jaqynda ǵana Jambyl oblystyq ishki ister departamentiniń demeýshilik kómegimen jańa «Rýhanı Jańǵyrý» kabıneti paıda boldy. Aıta ketken jón, óńirdegi kásiporyndar men mekemeler bul balalar úıine belsendi túrde kómek kórsetip keledi.
2017 jyldyń basynda atalmysh balalar úıinde 172 bala tárbıelengen (157 mektep oqýshysy jáne 15 mektepke deıingi bilim berý jasynda). Qazir olardyń sany 123, olardyń 38-i - jetimder, 85-i - ata-ana qamqorlyǵynan aıyrylǵan balalar. Bul balalar úıiniń ákimshiligi men tárbıeshileri sońǵy úsh jylda 189 tárbıelenýshiniń otbasylaryn tabýyna kómektesken.
B.Jaqsylyqovtyń aıtýynsha, Jambyl oblysy otbasy úlgisindegi balalar úıin ashý qarqyny boıynsha respýblıkada kósh bastap keledi. 2014 jylǵa deıin óńirde 2 osyndaı balalar úıi jumys istese, búginde olardyń sany 12-ge jetken. Jyl saıyn olardy qarjylandyrý ósip jatyr. 2014 jyly 6,2 mln teńge, 2015-te - 23,9 mln, al 2016 - 40 mln teńge bólingen. Sonymen qatar, sońǵy bes jylda olarǵa 277 páter kilti tabys etilgen.