Jambyl oblysyndaǵy vaktsına shyǵaratyn zaýyt keler jyly iske qosylady

TARAZ. QazAqparat – Jambyl oblysy Qordaı aýdanyndaǵy bıofarmatsevtıka zaýyty keler jyldyń alǵashqy toqsanynda iske qosylady, dep habarlaıdy QazAqparat tilshisi.

Jambyl oblysynyń ákimi Berdibek Saparbaev aýdanǵa jumys sapary barysynda atalǵan zaýyttyń qurylys barysymen tanysty.

Bıologııalyq qaýipsizdik problemalary ǵylymı-zertteý ınstıtýtynyń jańa bıofarmatsevtıka zaýyty Qordaı aýdanynyń damýyna aıtarlyqtaı serpin berýge qaýqarly Aımaq basshysy eýropalyq tehnologııa boıynsha salynyp jatqan óndiris qurylysynyń barysymen tanysty. Zaýyt ónimderi, vaktsınalar álemdik farmatsevtıkalyq naryqtarda satylady dep josparlanyp otyr.

Tehnıkalyq baqylaý ókili Rahmanqul Baıtelıevtiń aıtýynsha, qurylys-montajdaý jumysy bıyl aıaqtalyp, jabdyqtardyń bir bóligi jetkizilmek. Al, negizgi bóligi 2021 jyly ornatylady. Sebebi, olardy daıyndaýǵa 8-9 aı ýaqyt qajet eken. Qazirgi ýaqytta barlyq ınjenerlik kommýnıkatsııa júrgizilip, jumysqa 145 adam men 30 tehnıka jumyldyrylǵan. Qazirgi boljam boıynsha, zaýyt kelesi jyldyń birinshi toqsanynda jumysyn bastaýy múmkin.

Aıta keteıik, atalǵan zaýyt tıisti óndiristik tájirıbeniń halyqaralyq standarty boıyn­sha ımmýnobıologııalyq dári-dármek­ter, onyń ishinde koronavırýs ınfektsııasy­na qarsy vaktsına shyǵarmaq. Qazir ınstı­týt­tyń koronavırýs indetine qarsy kan­dı­dattyq vaktsınasy DDU tizimine en­gi­zil­gen jáne klınıkaǵa deıingi synaqtan sátti ótýde. Sondaı-aq kásiporynda pande­mııalyq tumaýǵa, týberkýlezge, brýtsellezge, nodýlıarlyq dermatıtke, kúıis qaıyratyn usaq janýarlar obasyna, qoı men eshkiniń kontagıozdy ektımasyna, qoı sheshegine, qutyrmaǵa jáne basqa da juqpaly aýrýlarǵa qarsy vaktsınalar shy­ǵarylady. Qurylys jumystaryn bıyl jel­toqsan aıynda aıaqtaý jáne jyl saıyn bıofarmatsevtıkalyq preparattardyń 60 mln dozasyna deıin óndirý kózdelgen.