Jambyl oblysyndaǵy túrmede jarty kelige jýyq esirtki tárkilendi
ASTANA. QazAqparat - Jambyl oblysyndaǵy túrmede jarty kelige jýyq esirtki tárkilendi, dep habarlaıdy QazAqparat QR ІІM QAJ komıtetiniń baspasóz qyzmetine silteme jasap.
Tártip saqshylary túzeý mekemesine kirmek bolǵan kásipkerden iri kólemde esirtki tárkiledi.
«Óńirdegi kolonııalardyń birinde óndiris ornyn ashqan kásipker qyzmetkerlerimizdiń nazaryna birden ilikti. Qyzmet barysynda qyraǵylyq tanytqan tártip saqshylary kásipkerdi tintý barysynda onyń aıaq jaǵynan tsellofanǵa oralǵan 6 qaltasha tapty», - deıdi oblystyq QAJ departamentiniń basshysy Mırjan Smaǵulov.
Komıtettiń baspasóz qyzmetiniń málimetinshe, bul bıylǵy jyldaǵy tárkilenip otyrǵan alǵashqy iri kólemdegi esirtki.
Sot-hımııalyq saraptama qorytyndysy atalǵan zattyń jarty kelige jýyq marıhýana ekendigin kórsetti.
Qazir atalǵan fakti Sotqa deıingi tergep-tekserýlerdiń biryńǵaı tizilimine tirkelip, tekserý jumystary bastalǵan.
