Jambyl oblysyndaǵy týrıstik nysan - Aqyrtasqa barý aqyly bolady
TARAZ. QazAqparat - Jambyl oblysyndaǵy tanymal tarıhı-tabıǵı eskertkish, Taraz qalasynan 40 shaqyrym jerde, Qyrǵyz Alataýynyń eteginde ornalasqan tylsymǵa toly Aqyrtas ejelgi qalashyǵy aqyly jumys rejımine aýysty.
«2015 jyly QR Mádenıet jáne sport mınıstriginiń buıryǵymen QR «Memlekettik múlik týraly» 15 baby, 13 bólimine sáıkes, respýblıkalyq memlekettik kásiporyndardyń aqyly qyzmetin ózekti etý úshin, aqyly qyzmet kórsetý túrleriniń erejeleri bekitildi, - dedi memlekettik «Ejelgi Taraz eskertkishteri» tarıhı-mádenı qoryq-murajaıynyń dırektory Táken Moldaqynov «QazAqparat» HAA tilshisine bergen suhbatta. - Endi bizdiń uıym memlekettik qazynashylyq kásiporyn (MQK) mártbesin ıelengen soń, ózin-ózi qarjylandyryp, óz betimen qarajat tabýy tıis. Ol úshin Jambyl oblysyndaǵy birneshe týrıstik nysandarǵa barýdy aqyly etý josparlandy. Olar T.Rysqulov aýdanyndaǵy Aqyrtas qalashyǵy, Jambyl aýdanyndaǵy Aısha bıbi keseneleri jáne Taraz qalasyndaǵy Qarahan kesenesi».
Alaıda, Jambyl oblysy ákiminiń orynbasary Erqanat Mánjýov qasıetti oryndarǵa zııarat etýshilerdiń múddeleri eskerilgenin aıtty.
«Tek qana Aqyrtasqa ruqsat etildi, sol nysan ǵana aqyly, qalǵan nysandarǵa tegin barýǵa bolady», - dep málim etti E.Mánjýov.
Táken Moldaqynovtyń aıtýynsha, «Ejelgi Taraz eskertkishteri» qoryq-murajaıy jetkilikti túrde qarjylandyrylmaıdy. «Oblysymyzdaǵy arheologııalyq jumystar men nysandardy jóndeýge bólinetin qarajat qazba jumystarymen aınalysatyn uıymdarǵa jiberiledi. Bul qarjyny biz kórmeımiz de. Ekskýrsııa jetekshileri, júrgizýshiler, tehnıkalyq jumysshylardan quralǵan kishigirim shtatymyzda 15 adam bar. Jambyl oblysynyń kóptegen tarıhı eskertkishteri bizdiń baqylaýymyzda. Bul jaǵdaıda bizge eskertkishteri saqtap qalý emes, turǵyn úı-kommýnaldy qyzmetter aqysy men qyzmetkerler eńbekaqysyn qalaı tóleımiz dep bas qatyrýǵa týra keledi», - dedi «Ejelgi Taraz eskertkishteri» tarıhı-mádenı qoryq-murajaıynyń dırektory.
Aqyrtas - Jambyl oblysyndaǵy adam kóp keletin týrıstik nysandardyń biri. Úlken qyzyl tastardan salynǵan bul biregeı tarıhı nysan óziniń tylsym qupııasymen qazaqstandyq jáne sheteldik ǵalymdardyń qyzyǵýshylyǵyn týǵyzýda. «Ejelgi Taraz eskertkishteri» tarıhı-mádenı qoryq-murajaıynyń qamqorlyǵymen joldan jyraq, sýsyz, qumdy aýmaqta ornalasqan bul tarıhı keshen retke keltirildi. Munda arheologtarǵa arnalǵan konferents-zaly, kishigirim qonaq úıi jáne jumys kabınetteri bar ǵylymı aqparattyq-saraptamalyq ortalyq ǵımaraty salyndy.
Aqyrtas týraly alǵash ret 1222 jyly Qytaıdan Saıram arqyly Samarqandqa, Shyńǵyshan qosynyna barǵan daoss tahýasy Chan Chýnniń kúndeliginde aıtylady. 
