Jambyl oblysyndaǵy sý qoımalarynyń jaǵdaıy baqylaýda
TARAZ. QazAqparat - Jambyl oblysynda týyndaýy múmkin sý tasqyndarynyń aldyn alý úshin óńirlik tótenshe jaǵdaılar departamentiniń 200-den astam qutqarý bólimshesi men arnaýly toby quryldy, dep habarlaıdy QazAqparat tilshisi.
«Oblys aýmaǵynda Shý, Talas jáne Asa ózenderiniń arnasynan tasýy saldarynan biraz jerdi sý shaıýy múmkin. Jýaly, Merki, Rysqulov, Qordaı jáne Talas aýdandarynan ótetin ózenderde laı kóshkini júrý qaýpi de joq emes. Eger aýa temperatýrasy birden kóteriletin bolsa, sý tasqyny oblystaǵy barlyq aýdanda baıqalýy múmkin», - deıdi TJD tótenshe jaǵdaılardy eskertý bóliminiń bastyǵy Omar Tákeev.
Onyń aıtýynsha, sý tasqyndarynyń aldyn alý jáne onyń saldaryn barynsha azaıtý boıynsha jyldyq jospar jasalǵan.
«Osy maqsatta 95 arna, 155 aryq jelisi tazartyldy. Temirjoldar men avtomobıl joldarynda 100-ge jýyq kópir jáne 500-den astam sý ótkizý qubyrlary tazalandy», - deıdi ol.
Oblystyq TJD «Qazgıdromet» RMK jáne «Qazseldenqorǵaý» MM fılıaldarymen birlese otyryp, taýly aımaqtar men taý baýraılaryndaǵy qardyń erýin, onyń ákep soqtyrýy múmkin saldaryn baǵalap otyr.
«Óńirdegi qardyń qalyńdyǵy ortasha 20-25 sm. Degenmen aýa temperatýrasynyń kenet kóterilýi sý qoımalarynyń birden tolýyna sebep bolady. Kóktemdegi eń qaýipti aımaqtardyń biri retinde Shý ózenin aıtýǵa bolady. Ózenniń keıbir jerlerinde qardyń qalyńdyǵy 65 santımetrge deıin jetedi», - deıdi O. Tákeev.
Budan tys, oblystaǵy sý qoımalary men gıdrotoraptar úzbeı baqylanyp otyr. Sý tasqyny bola qalǵan jaǵdaıda turǵyndardy ýaqytsha kóshire turý úshin 40-tan astam qabyldaý pýnkti (bilim berý jáne mádenıet nysandary), 30 shatyr, eki myńnan astam kereýet ázirlendi. Oblystyń azamattyq qorǵanys aýmaqtyq kúshteri quramynda jeke quramnyń eki myńnan astam qyzmetkeri, 600 tehnıka bar.
