Jambyl oblysyndaǵy sý kanaldaryn jóndeý jumystarynda kemshilikter bar
Naqtylaı aıtqanda, óńirdegi Jambyl, Jýaly, Baızaq, Qordaı, Merki aýdandaryndaǵy sý kanaldaryn, drenajdyq júıeler men sý nysandaryn qaıta jańǵyrtý boıynsha 34 joba júzege asýda. Jobalardyń jalpy quny 26,5 mıllıard teńgeni quraıdy, búgingi tańda onyń 12,8 mıllıard teńgesi ıgerilgen. Qazirgi tańda 91 kanaldy (380,9 shq), 321 sý nysandaryn, 33 qudyqty jóndeý jumystary aıaqtalǵan. 173 kanaldyń jóndeý jumystary jalǵasýda, olar keler jyly aıaqtalmaq. Bul jumystardyń nátıjesinde oblys boıynsha 53,965 myń ga sýarmaly jerdi qalpyna keltirý josparlanýda (23,9 myń ga qalpyna keltirildi).
Jambyl oblysynyń ákimi birqatar kanaldar boıynsha jóndeý jumystarynyń áli kúnge aıaqtalmaı otyrǵanyn synǵa aldy.
«Jalpy kórsetkishter kóńil kónshitpeıdi. Merdigerler jyl sońyna deıin jumystyń 85-90 paıyzyn oryndaımyz dep ýáde bergen. Jańa vegetatsııalyq maýsym bastalǵanǵa deıin barlyq nysandar tapsyrylýy kerek edi. Bizge syltaý emes, naqty nátıje kerek. Qarjyǵa qatysty barlyq máseleler sheshilgen. Merdigerlerge qurylys jumystaryn keshiktirýge eshqandaı sebep joq», - dedi Nurjan Nurjigitov.
Aımaq basshysy ár joba boıynsha merdigerlerden jeke-jeke jaýap aldy.
«Aýyl turǵyndary tańerteńnen keshke deıin alqapta jumys isteıdi. Olar bir kúndi de bosqa ótkizbeýge tyrysady. Sharýalar úshin sýdyń der kezinde berilgeni mańyzdy. Al, sizder kabınette otyryp, qujattardy retteı almaı otyrsyzdar.
Vegetatsııalyq kezeń bastalǵanǵa deıin jumys 100 paıyz aıaqtalýy tıis. Bizdiń negizgi maqsatymyz – aýyl sharýashylyǵy óniminiń kólemin arttyrý», - dep atap ótti ákim.
Kompanııa ókilderine jumys kestesi buzylǵan jáne óz mindettemelerin oryndamaǵan jaǵdaıda olarmen kelisim-shart buzylatyndyǵy eskertildi.