Jambyl oblysyndaǵy Sarysý aýdanyna jańa ákim taǵaıyndaldy

TARAZ. QazAqparat – Jambyl oblysy ákiminiń ókimimen Qazaqstan Respýblıkasy Prezıdenti Ákimshiliginiń jáne aýdandyq máslıhat depýtattarynyń kelisimimen Baqytjan Jaqsylyqov Sarysý aýdanynyń ákimi bolyp taǵaıyndaldy, dep habarlaıdy QazAqparat tilshisi.

Oblys ákimi Berdibek Saparbaev jańa basshyny aýdan aktıvine tanystyrdy.

Óńir basshysy aýdannyń jańa ákimine aýdannyń áleýmettik-ekonomıkalyq damýy, zańdylyq pen tártiptiń saqtalýy, qoǵamdaǵy birlik pen kelisimdi nyǵaıtý boıynsha birqatar mindetter júktedi.

- Sarysý aýdanynyń áleýeti zor. Munda óndiristik sektor, aýyl sharýashylyǵy jáne kásipkerlik júıeli túrde damýda. Aýdannyń jańa basshysy osy qarqyndaǵy jumysty jalǵastyrýy tıis. Prezıdent Qasym-Jomart Toqaev «Halyq úninen qulaq asatyn memleket» tujyrymdamasyn qalyptastyrýdy tapsyrdy. Jergilikti ákimder halyqqa jaqyn bolyp, máselelerdi birge sheshýi kerek, - dedi oblys ákimi.

Baqytjan Jaqsylyqov aımaq basshysyna senim artqany úshin alǵysyn bildirip, Sarysý óńirin damytý jolyna bar kúsh-jigeri men múmkindikterin jumsaıtynyn jetkizdi.

Baqytjan Alpysuly 1972 jyly Jambyl oblysy Sarysý aýdanynda dúnıege kelgen.

Qazaq Ulttyq tehnıkalyq ýnıversıtetin «ınjener-qurylysshy» mamandyǵy boıynsha bitirgen.

Eńbek jolyn 1995 jyly Qazaq ulttyq tehnıkalyq ýnıversıtetinde oqytýshy bolyp bastaǵan.

Ár jyldary Sarysý aýdany ákimi apparatynyń, aýdandyq Zeınetaqy tóleý jónindegi ortalyǵynyń bas mamany, aýdan ákimi apparatynyń bas ınspektory, bólim meńgerýshisi, shaǵyn jáne orta kásipkerlikti qoldaý jónindegi aýdandyq komıtettiń tóraǵasy, Jańatas qalasynyń ákimi qyzmetterin atqarǵan.

Sondaı-aq, Sarysý aýdany ákiminiń apparatyn basqarǵan. Sarysý aýdany ákiminiń orynbasary, Taraz qalasy ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy laýazymdarynda bolǵan.

2019 jyldyń naýryz aıynan bastap «Taraz Qurylys Invest»kompanııasynyń bas dırektory bolyp jumys istep kelgen.