Jambyl oblysyndaǵy respýblıkalyq trassalarda jol erejesi bir kúnde 247 ret buzylǵan
TARAZ. QazAqparat – Jambyldyq polıtseıler oblys aýmaǵyndaǵy respýblıkalyq mańyzy bar avtojoldarda bir kúnde 250-ge jýyq jol erejesin buzý faktisin anyqtady, dep habarlaıdy QazAqparat tilshisi.
Júrgizýshiler arasynda kólik tártibin arttyrý jáne jol-kólik oqıǵalarynyń sanyn azaıtý, sondaı-aq Jambyl oblysynyń aýmaǵynda jol qozǵalysy erejelerin buzýdyń aldyn alý maqsatynda «Qaýipsiz jol» jedel-aldyn alý sharasy ótkiziledi.
Profılaktıkalyq reıdtiń bir kúninde respýblıkalyq mańyzy bar joldarda 247 ákimshilik quqyq buzýshylyq anyqtaldy. Atap aıtsaq, 79 júrgizýshige qatysty qozǵalys jyldamdyǵyn arttyrǵany úshin ákimshilik hattama toltyryldy. Al, kólik quralyn mas kúıinde basqarǵan 1 júrgizýshi jáne baǵdarshamnyń tyıym salynǵan bóliginen ótken 1 júrgizýshi anyqtaldy. Sondaı-aq, mindetti tehnıkalyq baıqaýdan ótpegen kólik quralyn basqarǵan 5 júrgizýshi ákimshilik jaýapkershilikke tartylsa, jol qozǵalysy erejesin buzǵan 14 jaıaý júrginshi anyqtaldy.
«Qaýipsizdik beldigin taqpaı kólikti basqarǵan taǵy 10 júrgizýshi, manevr jasaý erejelerin buzǵan 7, kólik quralyn basqarý kezinde uıaly telefondy paıdalanǵan 13 júrgizýshi anyqtalyp, aıyp turaǵyna 1 avtokólik qoıyldy», - dedi Jambyl oblysynyń PD BPP komandıri Serǵazy Ábdiqulov.
