Jambyl oblysyndaǵy Prezıdent rezıdentsııasy oqý-saýyqtyrý ortalyǵy bolyp qaıta ashyldy
Jambyl aýdany Grodekovo aýylyndaǵy ortalyqtyń saltanatty ashylýyna Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Joldas Batyrhan, Jambyl oblysynyń ákimi Nurjan Nurjigitov qatysty.
«Jylyna 1000 balaǵa deıin qabyldaıtyn «Móldir bulaq» oqý-saýyqtyrý ortalyǵyna bıyl oblystyq bıýdjetten 600 mıllıon teńgeden astam qarjy bólindi. Barlyq jaǵdaıdy jasaýǵa tyrystyq. Eki úlken oqý ortalyǵy bar. Endi shtat ashý, qarajat bólý jóninde taǵy da usynystar túsip jatyr. Biz onyń barlyǵyn qoldaımyz», - dedi oblys ákimi.
Jalpy, búginde respýblıka boıynsha 218 balalar ortalyǵy bar. Olardyń 17-si ǵana – jyl boıy jumys isteıtin oqý-saýyqtyrý ortalyǵy. 18-ortalyq Jambyl oblysynda ashylyp otyr.
«Jasyratyny joq, táýelsizdik alǵan jyldary biz 600-ge jýyq balalar ortalyǵyn joǵaltyp aldyq. Osyny eskere kele, Memleket basshysy ákimderge eki mindet júktedi. Alǵashqysy 2026 jylǵa deıin el aýmaǵynda 50 saýyqtyrý ortalyǵyn qurý bolsa, ekinshisi rezıdentsııalardy balalarǵa oqý-saýyqtyrý ortalyǵy retinde ashý. Osy eki tapsyrma da tuńǵysh ret Jambyl oblysynda júzege asty», - dedi saltanatty sharada Oqý-aǵartý mınıstrligi balalardyń quqyqtaryn qorǵaý komıteti tóraǵasynyń orynbasary Joldas Batyrhan.
Aıta keteıik, jalpy alańy 10 gektar bolatyn oqý-saýyqtyrý ortalyǵynda 5 jatyn korpýsy, 2 basseın, sporttyq alańdar, medpýnkt, úıirmelerge arnalǵan ǵımarat, kovorkıng ortalyǵy jáne golf klýby bar.
Balalar bul ortalyqta jaz mezgilinde 12 kúndik, basqa kezeńderde 24 kúndik saýyqtyrýmen qamtylady. Jyl boıyna qyzmet etetin ortalyqta bir aýysymda 5-9 synyp aralyǵyndaǵy 50 bala demalady. Onyń ishinde múmkindigi shekteýli, úzdik oqyǵan, kópbalaly otbasyndaǵy balalarǵa da aıryqsha nazar aýdarylady.
Ortalyqta balalar 10 túrli úıirmege qatysyp, shyǵarmashylyqtaryn shyńdaýmen qatar, voleıbol, fýtbol, basketbol syndy sporttyq oıyndardy da oınaıdy. Shahmat, toǵyzqumalaq jáne asyq atý sekildi ulttyq oıyndardy úırenedi, jalpy alǵanda balanyń shyǵarmashylyq jáne zııatkerlik damýyna erekshe kóńil bólinedi.
Buǵan deıin Jambyl oblysynda «Ata men nemere» monýmenti ashylǵanyn habarlaǵan bolatynbyz.
