Jambyl oblysyndaǵy poıyz apaty: 14 poıyzdyń qoǵalys kestesi qalpyna keldi

ASTANA. QazAqparat - Jambyl oblysyndaǵy júk poıyzynyń apatynan toqtaǵan 14 poıyzdyń qozǵalys kestesi qalpyna keltirildi, dep habarlaıdy QazAqparat tilshisi.

«Jambyl oblysynda bolǵan júk poıyzy apatynan 19 poıyzdyń qozǵalys kestesi ózgergen edi. Qazirgi ýaqytta jedel jumystardyń arqasynda 19 poıyzdyń beseýi ǵana keshiktirilip jatyr», - dedi «Jolaýshylar tasymaly» AQ bas dırektory Arman Sultanov QTJ bas ǵımaratynda ótken brıfıngte.

Onyń aıtýynsha, azdaǵan ýaqyttan soń, atalǵan 5 poıyzdyń kestesi de jaqyn arada qalpyna keledi.

«Erteńge deıin qalǵan 5 poıyzdyń kestesin belgilengen ýaqytyna qaıtarǵymyz keledi», - dep óz sózin tolyqtyrdy Arman Sultanov.

Aıta keteıik, 31 shilde kúni Jambyl oblysynda júk poıyzy relsten shyǵyp ketti. Apat saldarynan 19 poıyzdyń qozǵalys kestesi ózgerdi.

QR Investıtsııalar jáne damý mınıstrligi bekitken jolaýshylar men júk tasymaldaý erejesine sáıkes, jolaýshylarǵa jolda turǵan árbir saǵat úshin bılet qunynyń 3 paıyzy tólenedi. Ázirge jolda turyp qalǵan 1400 jolaýshy ótemaqy alýǵa júgindi, olarǵa jalpy somasy 4,5 mln teńge ótemaqy tólendi.

Jańartylǵan keste ulttyq kompanııanyń saıtynda jarııalanǵan.