Jambyl oblysyndaǵy pılottyq jobany basqa óńirlerge de qoldaný qajet – Premer-Mınıstr

NUR-SULTAN. QazAqparat – Jambyl oblysynda aýyl turǵyndarynyń tabysyn arttyrý týraly pılottyq jobada 11 aýyldaǵy kásipkerler sany 3 ese kóbeıdi. Bul týraly QR Premer-Mınıstri Asqar Mamın aıtty, dep habarlaıdy QazAqparat.

Jalpy osy baǵdarlamaǵa 8 myńnan astam jeke jáne qosalqy sharýashylyqtar qatysqan.

«Halyqtyń jumyspen qamtylýy ósti jáne osy jobaǵa qatysatyn adamdardyń ortasha tabysy 2 esege artty. Al ataýly áleýmettik kómek alýshylar sany 3 ese azaıdy. Oblystyń aýyl turǵyndarynyń tabysyn arttyrý tájirıbesi óz tıimdiligin kórsetti jáne Memleket basshysy tarapynan qoldaý tapty. Bul jobany eldiń basqa óńirlerinde de qoldaný qajet», - dedi Asqar Mamın Úkimet otyrysynda.

Onyń aıtýynsha, jobany basqa oblystarda iske asyrý úı irgesindegi jerlerdi paıdalaný tıimdiligin, úıdegi mal sharýashylyǵynyń ónimdiligin arttyrady, úlestik jer telimderin ońtaıly paıdalaný, kooperatıvterdi qajetti tehnıkamen jabdyqtaý jáne aýyldaǵy bıznes jobalardy qarjylandyrý qamtamasyz etiledi.

«Osyǵan oraı Aýyl sharýashylyǵy mınıstrligine Eńbek, Ulttyq ekonomıka, Qarjy mınıstrlikterimen jáne «Atameken» palatasymen birlesip, bir aı ishinde jobany basqa óńirlerde de keńinen qoldaný jónindegi jol kartasyn ázirleýdi tapsyramyn», - dedi Premer-Mınıstr.

Aıta keteıik, Elbasynyń tapsyrmasymen 2019 jyly Jambyl oblysynda aýyl turǵyndarynyń tabysyn arttyrý úshin pılottyq joba bastalǵan edi.

Aýyl turǵyndarynyń tabysyn arttyrý jobasy 5 baǵytta júzege asty: birinshi baǵyt – úı irgesindegi jerlerdi paıdalaný, ekinshi – mal basyn kóbeıtý, úshinshi – aýyl syrtyndaǵy jerlerdi paıdalaný, tórtinshi – tehnıka berý, besinshi – kásip ashýǵa qoldaý kórsetý.

Sonyń nátıjesinde 11 aýyldyń ózinde 45 myńnan astam mal satyp alyndy, 10 myń gektardan astam jer biriktirilip, kooperatıv quryldy, 190 tehnıka alynyp, óńdeý, jylyjaılar sekildi 11 kásip ashyldy. Osy joba nátıjesinde 2 282 kásipker resmı tirkeldi, 589 jańa jumys orny ashyldy.