Jambyl oblysyndaǵy oqıǵa: tasqyn sý maldardy aǵyzyp áketti

TARAZ. QazAqparat - Jambyl oblysy aýmaǵynda 20 mamyr kúni taǵy da sel júrip, birneshe eldi meken sý astynda qalǵan bolatyn. Zardap shekkender oqıǵanyń qalaı bolǵanyn baıandady, dep habarlaıdy QazAqparat.

Kókaryqtyqtar katty nóser keshki bester shamasynda bastalyp, arty selge ulasty deıdi. Aıtýlarynsha, saı-salamen júıtkı aqqan tasqyn sý joldaǵyny jaıpap ótip, eski kanaldardy qoqysqa toltyryp tastaǵan. Sonyń kesirinen kópirler bitelip, taý bókterindegi alty aýyldy sý basypty. Al eki kesh arasynda ne isterin bilmeı dal bolǵan halyq óristen qaıtqan malyn tappaı áýrege túsken.

«Birtalaı maıda mal sýǵa aǵypty. Joǵary jaqta, Qumaryqta. Osy bále jylda bolady negizi. Osyǵan bir amal bolady ma, bolmaıdy ma?»,- deıdi Kókaryq aýylynyń turǵyny Jeksentaı Súıinbaev.

«Aǵaıyn, el-jurt jınalyp myna jerdi qazyp, kúshpen bárin ashyp, sýdy zorǵa degende toqtattyq. Bylaı qaraı ketti. Túngi saǵat 11-ge deıin, 12-ge deıin sý saryldap aǵyp jatty»,- dedi Kókaryq aýylynyń turǵyny Darıǵa Ábdikerimova.

Turǵyndar mundaı tabıǵı apattar eki-úsh jylda qaıtalanyp turady deıdi. Aıtýlarynsha, bul joly da kútken kómek kesh kelgen. Sonyń kesirinen, 11 úıge sýdyń zardaby tıgen.

« Budan bólek jaýyn saldarynan Órnek aýyldyq okrýgine qarasty kópirge zaqym keldi», - dedi Jambyl oblystyq TJD basqarma bastyǵy orynbasarynyń mindetin atqarýshy Gúlnár Jamantaeva.

Qazir turǵyndar birigip qyzyl sý astynda qalǵan qora-qopsy, aýlasyn tazartyp jatyr. Al órnektikter aýyl irgesindegi jalǵyz kópirin jóndeýge kirisipti. Ázirge tabıǵı apat saldarynan kelgen shyǵyn kólemi belgisiz.