Jambyl oblysyndaǵy oq-dáriler basqa qoımalarǵa kóshiriledi

NUR-SULTAN. QazAqparat - Jambyl oblysynyń Baızaq aýdanynyndaǵy áskerı bólimdegi qoımalarda saqtalǵan oq-dári el aýmaǵyndaǵy basqa qoımalarǵa kóshirilýi múmkin. Bul týraly QR Qorǵanys mınıstriniń orynbasary Daryn Tuıaqov aıtty, dep habarlaıdy QazAqparat tilshisi.

«Tutas baǵdarlama qabyldanyp, osy baǵytta qurylys jumystary júrip jatyr. Bul jumyspen Indýstrııa jáne ınfraqurylymdyq damý mınıstrligi aınalysyp otyr», - dedi D. Tuıaqov Májiliste tilshiler saýalynda jaýap berý kezinde.

Onyń sózine qaraǵanda, oq-dárini shyǵarý úshin arnaıy daıyndalǵan oryndar jasaqtalǵan.

«Ondaǵy oq-dárilerdiń barlyǵy túrli qoımalarǵa jetkiziledi. Mysaly, Aıagózge nemese basqa da birneshe qoımaǵa tasymaldanbaq. Naqty qaıda, qansha jetkizilgenin aıta almaımyn. Jalpy, tıisti jumystar jalǵasyp jatyr», - dedi ol.

«Úkimettik komıssııa jumys isteıdi, oǵan vıtse-premer jetekshilik etip otyr. Osy komıssııa aıasynda keshendi jumystar atqarylady. Jańa qoımalar salynyp, atalǵan oq-dári sol oryndarǵa shyǵarylady», - dedi Daryn Tuıaqov.

Eske sala ketsek, 26 tamyzda Jambyl oblysy Baızaq aýdanynyndaǵy Qaınar aýylynyń janynda ornalasqan áskerı bólimdegi qoımalardyń biriniń janynda áýeli órt bastalyp, odan keıin birneshe jarylys bolǵan. Jambyl oblysyndaǵy jarylystan 17 adam qaza bolǵan edi.