Jambyl oblysyndaǵy Moıynqum aýdanynda jel elektr stantsııasy salynady
Jobany frantsııalyq Total Eren kompanııasy júzege asyrmaq. Moıynqum aýdanynda qýattylyǵy 1 GVt bolatyn jel elektr stantsııasyn salý jobasyn kompanııa basshylyǵy Astanada QR Syrtqy ister mınıstrligi ınvestıtsııalar jónindegi komıtet tóraǵasy Ardaq Zebeshevpen, «Kazakh invest» UK» AQ, «Samuryq-Qazyna» UÁQ» AQ basshylary jáne Jambyl oblysynyń ákimi Nurjan Nurjigitovpen kezdesýde talqylady.
Kompanııanyń vıtse-prezıdenti Antýan Garre ózderiniń tabıǵat tazalyǵyna qurmetpen qaraıtyndyqtaryn jetkizip, jobanyń qorshaǵan ortaǵa áserin azaıtý baǵytynda zerdeleý jumystary júrgizilip jatqanyn tilge tıek etti. Sondaı-aq, ol jobaǵa qolaıly jerdi anyqtaý úshin negizgi jáne balama oryndar qarastyrylyp otyrǵanyn atap ótti.
Aımaq basshysy jergilikti bılik jobaǵa qoldaý kórsetýge daıyn ekenin aıtyp, ákimdik tarapynan jer telimin bólý boıynsha sharalar qabyldanyp jatqanyn jetkizdi.
«Bul joba biz úshin de mańyzdy. Oǵan jer telimin bólý úshin tıisti zańǵa ózgerister engizýge qatysty jumystar júrgizilip jatyr. Máseleni jedel sheshý boıynsha mınıstrlikterdiń qoldaýyna ıe bolyp otyrmyz. Jobany tabysty iske asyrý úshin kompanııamen birlesip áreket etýge daıynbyz», - dedi Nurjan Nurjigitov.
Aıta keteıik, kompanııa ókilderi 26-27 sáýir kúnderi Taraz qalasynda ótetin «ZHEIF-2023» halyqaralyq ınvestıtsııalyq forýmyna qatyspaq.
