Jambyl oblysyndaǵy mektepterdiń barlyq qyzmetkeri 100 paıyz vaktsınatsııalaýdan ótken
Qazirgi málimet boıynsha 1 qyrkúıekte Jambyl oblysyndaǵy 442 mektepke 240 myń oqýshy barady. 22 myńnan asa bala alǵash ret mektep tabaldyryǵyn attamaq.
Oblystyq bilim basqarmasy basshysynyń mindetin atqarýshy Talǵat Jamalovtyń aıtýynsha, bıyl 23 bilim berý nysanynyń qurylysyna 8,9 mlrd teńge bólinse, onyń 11-i bıyl paıdalanýǵa beriledi. Nátıjesinde bir apatty, 3 úsh aýysymdy, 2 oqýshy oryn tapshylyǵy bar, 2 tozyǵy jetken mekteptiń máselesi sheshiledi. Barlyǵy 16 bilim berý nysanyn kúrdeli jóndeýden ótkizýge 3,6 mlrd teńge baǵyttalǵan.
Barlyq mektepter beınebaqylaý kamerasymen qamtamasyz etilgen. 47 mektepte týrnıket, 18 mektepte dabyl túımesi ornatylǵan.
Talǵat Jamalov mektep oqýshylaryn jańa oqý jylynda oqýlyqpen jáne oqý-ádistemelik quralymen qamtamasyz etý jaıyna da toqtalyp ótti. Bul maqsatqa bıýdjetten 3,1 mlrd teńge bólingen. Memlekettik satyp alý negizinde satyp alynatyn oqý quraldaryn jetkizý 20 tamyzǵa deıin tolyǵymen aıaqtalady.
Bilim berý mekemeleriniń barlyq qyzmetkerleri (medıtsınalyq qarsy kórsetilimderi bar adamdardy qospaǵanda) COVID-19-ǵa qarsy vaktsına qabyldaǵan.
«Mektepterde sanıtarlyq talaptardy saqtaýǵa aıryqsha kóńil bólinetin bolady. Balalardyń densaýlyǵy bárinen mańyzdy, sondyqtan ár synyp óz kabınetinen aýyspaı oqıdy. Maska rejımi saqtalady. Barlyq bilim berý nysandary Ashyq qosymshasyna qosylǵan», - dedi Talǵat Jamalov.
Onyń aıtýynsha, eger bir oqýshydan koronavırýs dıagnozy anyqtalsa, onda sol synyp onlaın oqytý formatyna jiberiledi.
Aımaq basshysy tıisti basqarma men bilim berý sapasyn qamtamasyz etý jónindegi departamentke birqatar tapsyrmalar júktedi.
«Barlyq oqýshylardy oqýlyqtarmen, eldi mekenderdegi ınternettiń sapasy men jyldamdyǵymen qamtamasyz etý, apatty mektepter máselesin zerdeleý, mektepterdi oblystyq polıtsııa departamentiniń jedel basqarý ortalyǵymen ıntegratsııalaý boıynsha jumystardy aıaqtaý, bilim berý nysandaryn jylytý maýsymyna daıyndaýdy jedeldetý, oqýshylardyń qaýipsizdigin qamtamasyz etýdiń jańa júıesin engizý qajet», - dep talap etti óńir basshysy.
