Jambyl oblysyndaǵy maı zaýyty táýligine 30 tonna ónim shyǵarady
TARAZ. QazAqparat - Búginde Qazaqstan men Irannyń birlesken jobasy bolyp sanalatyn KazIrAgro kompanııasy táýligine 30 tonnaǵa deıin maqsary maıyn óndirýge qaýqarly, dep habarlaıdy QazAqparat tilshisi.
ÚIIB baǵdarlama jobalary aıasynda Jambyl oblysynda júzege asyrylyp jatqan KazIrAgro maqsary maı óndirisi zaýytynyń qýattylyǵy kún saıyn artyp keledi. Maı zaýyty Shý aýdanynda ornalasqan.
"KazIrAgro" kompanııasy 2011 jyly saflor maıyn shyǵarý úshin Germanııada shyǵarylǵan joǵary tehnologııalyq qondyrǵylarmen jabdyqtalǵan.
Jambyl oblysy ákimdigi baspasóz qyzmeti habarlaǵandaı, jobanyń jalpy quny 5,7 mln dollardy quraıdy.
«Zaýyt qazir tolyq jobalyq qýattylyqqa shyqty. Búgingi kúni maqsary, arpa, bıdaı jáne raps 3,5 myń gektar jerde ósiriledi. Kompanııa jyl ótken saıyn ónim kólemin de arttyrýdy josparlaýda. 2016 jyly 190 tonn maı óndirilgen. Jobany iske asyrý aıasynda 22 adam jumyspen qamtyldy», - delingen baspasóz baıanynda.
2014 jyldan bastar tabıǵı taza ónim Gollandııa, Belgııa men Qytaıǵa eksporttalýda. Memlekettik baǵdarlama aıasynda kompanııa 115 mln teńge qaryz alyp, jabdyqtaryn jańartqan. Jalpy eksport kóleminiń ulǵaıýy zaýyt óndiris kólemin kóbeıtýge múmkindik beredi.
Jambyl oblysy ákimdigi óńirdiń ekonomıkalyq kórsetkishteri, óndirilgen ónim kólemi, shaǵyn jáne orta bıznes sýbektileriniń qyzmetteri jyl saıyn artyp kele jatqandyǵyn atap aıtty. Máselen ótken jyly tamaq ónimderin óńdeý kólemi 41%-ǵa ósken. ShOB salasyndaǵy óndiris kólemi respýblıka boıynsha úzdik nátıje.
