Jambyl oblysyndaǵy qurǵaqshylyq: Qazgıdromet boljamy nege rastalmady

ASTANA. QazAqparat – Ekologııa jáne tabıǵı resýrstar mınıstrligi Jambyl oblysyndaǵy qurǵaqshylyqqa qatysty Qazgıdromed boljamynyń ne sebepti dál kelmegenin túsindirdi, dep habarlaıdy QazAqparat tilshisi.

«Aýa raıyna qatysty Qazgıdromet boljamynyń sapasy gıdrologııalyq jeliniń keńdigine baılanysty. Biz bul máseleni kóterdik. Gıdrologııalyq boljam jasaý úshin kórshi elderdegi Qyrǵyzgıdromet pen Ózgıdrometten málimetter alynady. Jalpy, Shý-Talas basseıni boıynsha boljam negizinen Qyrǵyzgıdromettiń málimetterine negizdelgen. Osy oraıda Qazgıdromettiń gıdrologııalyq beketter jelisin keńeıtý qajet máselesi týyndaıdy. Óıtkeni, gıdrologııalyq jelimen keńinen qamtylsa, aýa raıy boljamy dálirek bolady. Sonymen qatar bizge qosymsha qar kólemin ólsheıtin marshrýttardy ashý qajet. Bul máseleni de nazarǵa alyp, sý kodeksine engizdik», - dedi Zúlfııa Súleımenova Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń aıtýynsha, aýa raıy boljamy tsıklonǵa baılanysty keıde rastalmaýy múmkin.

«Aýa raıy boljamdarynyń keıde rastalmaýy damyǵan elderde de bar qubylys. Bizge gıdrologııalyq jeli aıasyn keńeıtý kerek. Bul bizdiń josparymyzda bar», - deıdi Z. Súleımenova.

Eske sala keteıik, Jambyl oblysynda qurǵaqshylyqtan sýarmaly jerlerde sý tapshylyǵy týyndaǵan edi. Aımaqtaǵy klımattyń ózgerýi nátıjesinde Shý jáne Talas ózenderiniń arnalarynyń jetkiliksiz tolýyna baılanysty sý tapshylyǵy oryn alǵan.