Jambyl oblysyndaǵy keıbir jol asýlary qys mezgilinde qaýipti
TARAZ. QazAqparat – Jambyl oblysyndaǵy Kúıik, Shaqpaq, Qordaı, Hantaý asýlary qys mezgilinde úlken qaýip tóndiredi. Bul týraly oblystyq tótenshe jaǵdaılar departamenti bastyǵynyń orynbasary, polkovnık Maqsat Qosybaev aıtyp berdi, dep habarlaıdy QazAqparat tilshisi.
Búginde oblystyń jalpy paıdalanymdaǵy avtomobıl joldarynyń uzyndyǵy 5187 kılometrdi qurasa, onyń ishinde 1237 shaqyrymy respýblıkalyq mańyzy bar joldar jáne 3950 shaqyrymy jergilikti mańyzy bar joldarǵa jatady. Sondaı-aq óńirdegi avtokólik joldarynda jalpy uzyndyǵy 120 shaqyrymnan asatyn 16 qar basý ýchaskesi bar.
«Respýblıkalyq jáne oblystyq mańyzy bar avtojoldarda, tıisti kúshter men quraldardy, jylytý pýnktterin kórsetý arqyly qar basý ýchaskileriniń elektrondyq kartasy ázirlendi. Qysqy kezeńde Kúıik, Shaqpaq, Qordaı, Hantaý asýlary úlken qaýip tóndiredi. Bul jerlerde meteorologııalyq jaǵdaıdyń nasharlaýy saldarynan apattar, avtomobılderdiń ótý múmkindiginiń tómendeýi jáne kólik quraldarynyń jınalýy múmkin. Qysqy kezeńge 28 jylytý pýnkti daıyndaldy, onyń ishinde 9-y respýblıkalyq mańyzy bar avtojoldarda, 6-y oblystyq mańyzy bar avtojoldarda jáne 13-i aýdandyq mańyzy bar avtojoldar boıynda ornalasqan»,-deıdi Maqsat Qosybaev.
Sondaı-aq, qosymsha jylytý pýnktteri retinde avtomobıl joldary boıynda ornalasqan bilim berý nysandary men eldi mekenderdiń meshitteri, sondaı-aq qoǵamdyq tamaqtaný obektileri paıdalanylatyn bolady.
