Jambyl oblysyndaǵy qant zaýyty otqa orandy
TARAZ. QazAqparat - Merki qant zaýytynyń tsehynda bolǵan órtti sóndirýge 30-dan astam adam jumyldyryldy, dep habarlady «QazAqparat» HAA tilshisi Jambyl oblystyq TJD baspasóz qyzmetine silteme jasap.
Mekemeniń baspasóz qyzmeti habarlaǵandaı, búgin túnde Merki aýdany Oıtal aýylyndaǵy qant zaýytynda órt boldy. Tilsiz jaý ǵımarattyń ekinshi qabatyndaǵy shyrynnan tazartý tsehynda tutanǵan. Saldarynan ekinshi qabat pen shatyr janyp ketti. Órt aýmaǵy 250 sharshy metrdi qurady.
Túngi eki jarymda sóndirilgen órtti aýyzdyqtaýǵa Jambyl oblysy TJD «Órt sóndirý jáne avarııalyq qutqarý jumystary qyzmeti» MM 25 qyzmetkeri, Merki aýdandyq TJB 2 qyzmetkeri, Merki aýdandyq ІІB eki adam, Merki aýdany ákimdiginiń tórt mamany jáne 9 dana tehnıka jumyldyryldy.
Merki qant zaýyty «Ortalyqazııalyq qant korporatsııasy» JShS fılıaly. Qazirgi ýaqytta zaýytta qaıta jóndeý jumystary júrip jatyr.
