Jambyl oblysyndaǵy energııa tapshylyǵy problemasyn joıý: 4 joba júzege asyrylýda
NUR-SULTAN. QazAqparat – Investıtsııalyq jobalardyń arqasynda únemi energııa tapshylyǵyn kórip otyrǵan Jambyl óńiriniń energetıkalyq táýelsizdigin arttyrýy kózdelip otyr. Bul týraly Ortalyq kommýnıkatsııalar qyzmetinde ótken brıfıngte Jambyl oblysynyń ákimi Berdibek Saparbaev aıtty, dep habarlaıdy QazAqparat tilshisi.
Oblystyń baspasóz qyzmeti bergen málimetke sáıkes, jyl basynan beri óńirde quny 25,7 mıllıard teńgeni quraıtyn jeti ınvestıtsııalyq joba júzege asyrylǵan. Onyń ishindegi eki joba – jalpy qýaty 9 MVt bolatyn «Wind Power city» JShS men «Wind Electricity» JShS jel elektr stantsııalarynyń qurylysy.
«Jalpy osy jyly oblysta qýaty 133,8 MVt bolatyn, quny 54,5 mıllıard teńgeni quraıtyn balamaly elektr qýatyn óndiretin tórt joba júzege asyrylýda. Jobalar aıaqtalǵannan keıin jańartylatyn energııa kózderiniń jalpy qýaty 403,65 MVt-ty quraıdy. Nátıjesinde olardyń úlesi óndiriletin elektr energııasynyń jalpy kóleminiń 30 paıyzyna deıin artady», – dedi aımaq basshysy.
Elektr energııasyn óndirýdi arttyrý – bul ónerkásiptik óndiris pen taýarlyq kásipkerlikti damytýǵa qarqyn qosyp, alǵa umtylyp jatqan aımaq ekonomıkasynyń mańyzdy quramdas bóligi. Máselen, tek «Qarapaıym zattar ekonomıkasy» baǵdarlamasy aıasynda 73 mıllıard teńgeniń 147 jobasy maquldandy jáne 49,1 mıllıard teńgege 136 joba nesıelendirilgen.
