Jambyl oblysyndaǵy eń las aımaq belgili boldy
TARAZ. QazAqparat - Ónerkásip kásiporyndary men kólikterden qorshaǵan ortaǵa keletin zııan jambyldyq ekologtardy qatty alańdatyp otyr, dep habarlaıdy QazAqparat.
«Osyǵan qaraı qazir jaǵdaıda baqylaýǵa alý úshin keshendi sharalar atqarylýda. Jambyl oblysynyń aýmaǵynda óńirdegi ekologııalyq jaǵdaıǵa monıtorıng júrgizip otyratyn 9 stansa bar»,-deıdi Jambyl oblysynyń bas ekologııalyq ınspektory Erlan Qoıshybaev.
Onyń sózinshe, 2017 jyly júrgizilgen zertteýlerdiń nátıjesi boıynsha, Jambyl oblysyndaǵy eń las qala Qarataý ekeni belgili boldy. Atalmysh aımaqta lastaný ındeksi 7,39-dy quraǵan. Al Tarazda bul kórsetkish budan tómendeý - 5,37. Degenmen bul az emes.
Qarataý Talas aýdanynyń ákimshilik ortalyǵy. Ónerkásip kásiporyndary shoǵyrlanǵan bul qala Qarataý-Jańatas fosfor basseıniniń ornyna salynǵan. 90-shy jyldary bul óńir toqyraýǵa ushyrady. Al qazir aımaqta ónerkásip qarqyndy damyp, ınfraqurylymy jańaryp keledi.
Erlan Qoıshybaevtyń sózinshe, 2003 jyldan bastap, ónerkásip óniminiń kólemi aımaqta Qarataýdy qosa alǵanda 2,5 esege artqan.
«Munda shamamen 50-ge jýyq ónerkásip jáne qaıta óńdeý kásiporyndary ashyldy. Osyǵan baılanysty aýaǵa lastaýshy zattardyń da tastalýy údedi. 10 jyl buryn zııandy zattardyń aýqymy oblys boıynsha, 20 myń tonnany qurasa, búgin bul kórsetkish 70-ke jetken. Bul rette kólikterden bólinetin zııandy gazdar da qorshaǵan ortanyń lastanýyna aıtyrlaqtaı yqpal etip otyrǵandyǵyn aıta ketken jón. 2007 jyly Tarazda 90 myńnan astam kólik bolǵan bolsa, búgingi olardyń sany úsh esege artqan. Soǵan qaraı aýada azot oksıdi men kómirqyshqyl oksıdi kóbeıgen. Munyń bári árıne, adamdardyń densaýlyǵyna zııan»,-dedi Erlan Qoıshybaev.
