Jambyl oblysyndaǵy Bılikóldi qalaı qutqarýǵa bolady
TARAZ. QazAqparat - Jambyl oblysyndaǵy Bılikól Qazaqstannyń ondaǵan iri kólderine kiredi. Biraq, burynyraqta balyǵy týlap jatqan kól qazirgi tańda qorǵaýǵa muqtaj, dep habarlaıdy QazAqparat tilshisi.
Jýaly aýdanynda ornalasqan Bılikól ótken ǵasyrda túrli balyqtarǵa toly bolǵan. Onyń jaǵalaýynda balyqshylar kenti oryn tepse, odan aýlanǵan balyqtar Qazaqstannyń kóptegen qalalaryna jiberilgen.
Ótken ǵasyrdyń 80-jyldary Jambyl oblysyndaǵy hımııalyq kásiporyndardan aqqan qaldyq sýlar osy kólge quıyp, sonyń saldarynan kólde zııandy zattar qospasynyń deńgeıi kóterilgen. Burynǵy ýaqytta kólde 30 túrli balyq mekendese, búginde tek beseý ǵana.
«Jambyl oblystyq hımııalyq ónerkásip kásiporyndary Bılikóldegi ekologııalyq apattyń basty sebepshisi. Biraq, olardyń bir de biri kóldi saqtap qalý úshin eshteńe jasaǵan joq», - deıdi jambyldyq jýrnalıst-ekolog Elena Efımova.
Jambyl oblystyq ekologııa departamentiniń bólim basshysy ıÝrıı Pasechnyıdyń pikirinshe, jaǵalaýdaǵy batpaqty jerlermen kúresý úshin dóńmańdaı balyǵyn jiberýge bolady. Sebebi, dóńmańdaı baldyrlarmen qorektenedi jáne ol sý aıdynynyń tamasha melıoratory bola alady.
«Zerthanalyq derekter boıynsha, Bılikóldegi lastaný ındeksiniń koeffıtsıenti 2015 jyly 2,83 bolǵan. Al, 2016 jyly 2,49, 2017 jyly 2,44-ti quraǵan. Bıyl on aıdaǵy kórsetkish boıynsha 2,11 bolyp otyr. Osylaısha, qazir sý aıdynynda ózdiginen tazalaný protsesi júrip jatyr. Biraq, ol óte baıaý. Bul protsesti jyldamdatý úshin ǵalymdar bakterııalyq ósimdikterdi qosý arqyly bıologııalyq tazartý ádisin usyndy», - dep atap ótti «Qazgıdromet» RMK Jambyl oblystyq bólimshesiniń dırektory Ánýar Álimjanov.
