Jambyl oblysyndaǵy «Aısha bıbi» polıgonynda oq-dáriler joıylýda
TARAZ. QazAqparat - Áleýmettik jelilerde birneshe kúnnen beri Taraz turǵyndary qaıta-qaıta estilip jatqan jarylys únine alańdaýshylyq bildirýde, tipti úılerdiń qabyrǵalary da qozǵalatyn jaǵdaılar bolǵan, dep habarlady «QazAqparat» HAA tilshisi.
«Ońtústik» óńirlik qolbasshylyǵyndaǵylardyń aıtýynsha, alańdaýǵa esh sebep joq. Oblys ortalyǵynan 20 shaqyrymdaǵy «Aısha bıbi» oqý-jattyǵý polıgonynda jarý jumystary júrip jatyr, oq-dáriler joıylýda», - dep habarlady «Ońtústik» ÓQ baspasóz qyzmetiniń basshysy Dına Mýharınova.
Onyń aıtýynsha, búginde oqý ortalyǵy sanalatyn polıgonda qarýdyń ár túrinen túrli atys uıymdastyrylady. Bul rette alańda oq-dáriler qalyp qoıady. Arnaıy polıgon komandasy atys aıaqtalǵannan keıin alańdy tazalaıdy, snarıadtar tabylǵan jaǵdaıda olardy jınap, josparly túrde joıady.
«Bul jumys turaqty túrde júrgiziledi. Sońǵy kúnderi jel baǵyty ózgerdi, sondyqtan da qalalyqtarǵa sezilip jatyr, taıaýda bul jumystar aıaqtalady», - dep túsindirdi Dına Mýharınova.
«Ońtústik» ÓQ qolbasshylyǵynda polıgon komandasy táýlik boıy jaýyngerlik kezekshilikte aýmaqty kúzetetinin aıtty.
