Jambyl oblysyndaǵy aýdandarda polıtsııanyń front keńseleri ashylýda
TARAZ. QazAqparat - Jambyl oblysynyń Merki jáne Jýaly aýdandarynda polıtsııa bólimderinde front keńseler ashyldy. Bul polıtsııanyń servıstik jumys modeline kóshýi boıynsha kezekti qadam bolyp otyr, dep habarlaıdy QazAqparat tilshisi.
Merkidegi «Azamattardy qabyldaý bólmesi» front keńsesi jergilikti polıtsııa bóliminiń ǵımaratynda ornalasqan. Kelýshilerdi qabyldaýǵa arnalǵan keń zalda kreslo jáne ústel qoıylǵan, onda adamdardy Biryńǵaı tirkeý bólimi memlekettik avtoınspektory men Ákimshilik polıtsııa bólimi kóshi-qon qyzmeti tobynyń aǵa ınspektorlary qabyldaıdy. Ótinish berýshige barlyq qajetti qujattarldyń resimdeıtin keńseniń arnaıy terezesi bar.
«Bul oblystyń aýdandarynda ashylǵan alǵashqy front-keńse. Al, Taraz qalasynda byltyr ashylǵan keńse óziniń tıimdiligin dáleldedi. Onda buǵan deıin 1,3 myńnan astam adam ótinishpen keldi. Aldaǵy aılarda osyndaı front-ofıster árbir aýdannyń polıtsııa bóliminde jumys isteıdi», - dedi oblystyq polıtsııa departamentiniń basshysy Arman Orazalıev.
Sondaı-aq, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basshysy Ravıl Tólebaev mundaı keńseler halyqpen ózara is-qımylynyń jańa, ashyq nysany ekendigin jáne sybaılas jemqorlyqqa jol bermeıtinin etetinin atap ótti.
Aıta keteıik, jańa front-keńsede qabyldaý bólmesiniń qyzmetkerleri ótinish berýshimen tikeleı jumys isteıdi. Bul ótinishti qaraý ýaqytyn azaıtýǵa múmkindik beredi jáne máselelerdi sheshýde qol jetimdilikti, ashyqtyqty qamtamasyz etedi.
