Jambyl oblysyndaǵy Aqkóldiń arnasy tolyp, jaǵadaǵy aýylǵa qaýip tóndirip tur
TARAZ. QazAqparat - Jambyl oblysy men Taraz qalasynda sý tasqyny ahýalynyń aldyn alý sharalary júrgizilip jatyr, dep habarlaıdy «QazAqparat» HAA tilshisi Jambyl oblystyq TJD baspasóz qyzmetine silteme jasap.
Talas aýdanynda Aqkóldegi sý deńgeıiniń kóterilýi saldarynan Aqkól aýylyna sý tasqynynyń qaýpi tónip tur. Jobalyq syıymdylyǵy 264 mln tekshe metrdi quraıtyn kóldegi sýdyń deńgeıi 244,8 mln. tekshe metrge - 92%-ǵa jetti.
«Sýdyń kólemi dál osy qalpyn saqtap turatyn bolsa, Aqkól tasyp, jaǵadaǵy aýyldy sý alýy múmkin. Qazirgi tańda Aqkólge aǵyp keletin sýdyń kólemi sekýndyna 164,4 tekshe metrdi qurasa, aǵyp shyǵyp jatqan sýdyń kólemi - 120 tekshe metr», - dep túsindirdi vedomstvonyń baspasóz qyzmeti.
Aqkól aýylynda 2 115 adam turady, onda 424 turǵyn úı, 4 bilim berý nysany, bir densaýlyq saqtaý mekemesi men 4 áleýmettik mańyzy bar nysan bar. Turǵyn úılerdi sý basý qaýpin seıiltý úshin jergilikti atqarýshy organdar qoldan jasalǵan dambaǵa topyraq salynǵan myń dana qap tastady. Bul jumystarǵa 50 adam tartyldy.
Aqkól ózeniniń bógeti men Asa ózeniniń mańyna oblystyq TJD (15 adam men 3 tehnıka) jergilikti polıtsııa qyzmetimen birlesip kún saıynǵy kezekshilik uıymdastyrdy.
