Jambyl oblysynda jyldamdyq asyryp, jol erejesin buzǵandar kóbeıgen

TARAZ. QazAqparat - Birinshi jartyjyldyq qorytyndysy boıynsha Jambyl oblysynda jol-kólik oqıǵalarynyń sany 36 paıyzǵa azaıǵanymen, jyldamdyqty asyryp, jol erejelerin buzǵandar qatary kóbeıgen, dep habarlaıdy QazAqparat tilshisi.

Jambyl oblystyq polıtsııa departamenti baspasóz qyzmetiniń bergen málimetterine súıensek, sońǵy 6 aı ishinde oblysta 324 júrgizýshi mas kúıinde ustalyp, jyldamdyqty asyrǵandar sany 4,5 myńnan 8 myńǵa deıin ósken. Jaıaý júrginshilerdiń jol qozǵalysy erejelerin buzýdyń 8,5 myń deregi anyqtalǵan.

Osyǵan oraı, oblys polıtseıleri azamattardy jol-kólik oqıǵalarynyń aldyn alýǵa óz úlesterin qosýǵa shaqyrdy.

Іs-sharaǵa alǵashqylardyń biri bolyp ataqty sportshylar, oblystyq meshit ımamdary, jýrnalıster atsalysty.

Paralımpıada oıyndarynyń chempıony, júzýden QR halyqaralyq dárejedegi sport sheberi Zýlfııa Ǵabıdýllına, «Qazaqstan Barysy» týrnıriniń úsh dúrkin jeńimpazy Beıbit Ystybaev, bokstan álem chempıonatynyń 2023 jylǵy kúmis júldegeri Dýlat Bekbaýov, oblystyq hıbatýlla Tarazı meshitiniń naıb ımamy Ǵalymbek Japek, buqaralyq aqparat quraldarynyń ókilderi júrgizýshilerge beıneúndeý joldap, jol qozǵalysy erejelerin qatań saqtaýǵa shaqyrdy.

«Júrgizýshiniń bir asyǵys qadamy qaıǵyly jaǵdaılarǵa ákeledi, bala ákesinen, anasynan aıyrylady. Qurmetti jerlester, joldarda abaı bolaıyq! «Tártipke bas ıgen qul bolmaıdy». Bir qateliktiń kóptegen adamdardyń ómirin buzýyna jol bermeıik, – dedi óz úndeýinde Beıbit Ystybaev kólik júrgizýshilerine.

Buǵan deıin Jambyl oblysynda jyl basynan beri 121 kólik apaty oryn alǵanyn habarlaǵan bolatynbyz.