Jambyl oblysynda jyl basynan beri dinmen baılanysty 34 quqyqbuzýshylyq anyqtaldy

NUR-SULTAN. QazAqparat – Jyl basynan beri Jambyl oblysynyń polıtseıleri dinı saladaǵy 34 ákimshilik quqyqbuzýshylyqty anyqtady.

Sonyń ishinde 16 derek irgeles memleket azamattarynyń QR aýmaǵyna tyıym salynǵan ekstremıstik ádebıetti zańsyz kirgizýimen baılanysty, dep habarlaıdy QazAqparat Jambyl oblysy Polıtsııa departamentiniń baspasóz qyzmetine silteme jasap.

Oblystyń polıtsııa departamenti QR UQK Shekara qyzmetimen birlesip QR aýmaǵyna qazaqstandyq sot tyıym salǵan dinı mazmundaǵy ádebıetti kirgizý derekterin anyqtaý boıynsha turaqty túrde sharalar ótkizedi.

Ekstremıstik sıpattaǵy barlyǵy 27 kitap alyndy, QR ÁQBtK 453 baby (QR aýmaǵyna tyıym salynǵan ekstremıstik ádebıetti kirgizý) boıynsha Qyrǵyzstan Respýblıkasynyń 14 azamaty, Reseıdiń bir jáne Ózbekstannyń bir azamaty ákimshilikke jaýapqa tartyldy. 800 myń teńgeden astam aıyppul salyndy.

Mysaly, ekstremızge qarsy is-qımyl basqarmasynyń qyzmetkerleri elimizdiń aýmaǵyna kirmek bolǵan Qyrǵyzstannyń 52 jastaǵy azamatshasy ustaldy. Odan ekstremıstik mazmundaǵy ádebıet tabyldy. Atalmysh derek boıynsha ekstremızge qarsy is-qımyl basqarmasynyń qyzmetkerleri QR ÁQBtK 453 babyna sáıkes hattama toltyrdy, al Merki aýdanynyń soty kórshiles eldiń azamatshasyna 20 AEK kóleminde aıyppul saldy.