Jambyl oblysynda jyl basynan beri 500-den astam kólik tonalǵan
ASTANA. QazAqparat - Jambyl oblysynda avtokólik bólshekteriniń urlyǵy beleń alyp tur, dep habarlaıdy QazAqparat «Habar 24» agenttigine silteme jasap.
Jyl basynan beri óńirde osyndaı 500-den astam derek tirkelgen. Ásirese Taraz qalasynda qylmystyń bul túri kóp jasalady. Qazir óńirde urylarǵa qarsy jumys kúsheıdi. Alaıda budan shyqqan nátıje shamaly. Tártip saqshylary uryny ustap, qylmysy dáleldenip tursa da, qaıta bostandyqqa jiberýge májbúr.
Statıstıkaǵa sáıkes, avtokólik bólshekteri Tarazdaǵy 6,7,8,9 jáne 13-móltek aýdandarda jıi tonalady. Ásirese akkýmýlıator joǵaltyp, shaǵymdanatyndar kóp. Máselen, Ahan Seıdiqadirovtiń kóligi úı aýlasynan úsh márte tonalǵan.
«Jóndep, qalpyna keltirýge 150 myń teńgege shyǵyndaldym», - deıdi qala turǵyny.
Al polıtsııada Ahan sııaqty 534 adamnyń shaǵymy tirkelgen.
«Kóligimnen akkýmýlıatorymdy urlap ketti. Oǵan qosa magnıtofondy da túbimen sýyryp alyp ketken. Keıde 4 dóńgelegin de alyp ketedi. Ústinen tússeń, qol jumsaýǵa daıyn turady. Qoryqpaıdy múldem», - deıdi Ahan Seıdiqadirov.
Tártip saqshylary qylmyskerlerdi ańdyp júrip ustaıdy. Tergeıdi, tekseredi, qylmysyn dáleldeıdi. Biraq ury qamalmaıdy. Máselen, polıtseıler akkýmýlıator urlyǵyna qatysty 179 istiń izin sýytpaı ashqan. Alaıda osy 179 qylmysty jasaǵandardyń barlyǵy qazir bostandyqta júr. Nege? Ardaq Mádimarov, oblystyq krımınaldyq polıtsııa bastyǵy: -
«Sebebi jábirlenýshi tarap keshirim bergen. Sondyqtan biz olardy qamaı almaımyz. Arasynda birneshe ret urlyq jasap ustalǵandar da bar. Osyndaı 15 adam tirkeýde tur. Kásip qylyp alǵan. Tipti top bolyp jumys isteıdi. Olar zańdy ábden bilip alǵan. Jeke pikirim qylmyskerler jazalanyp, qamaqqa alynýy tıis. Qazir arnaıy algorıtm jasalyp otyr. Osyǵan qatysty prokýratýraǵa usynyspen shyǵyp jatyrmyz», - deıdi oblystyq krımınaldyq polıtsııa bastyǵy Ardaq Mádimarov.
Zańda urlyqtyń usaq, orta, aýyr, asa aýyr sanattaǵy túrleri qarastyrylǵan. Búgingi kúni aýyrlyǵy orta dárejedegi urlyqtar beleń alyp tur. Ol tonalǵan múliktiń baǵasyna qatysty anyqtalady. Taraz qalalyq №2 sotynda 11 aıda urlyq boıynsha 72 is qaralǵan. Onyń 33-i taraptardyń tatýlasýyna baılanysty óndiristen qysqartyldy. Arnaıy taldaý kórsetip otyrǵandaı, kólikterge kirip tonaıtyndardyń deni jumyssyz adamdar kórinedi.
