Jambyl oblysynda jyl basynan beri 25 brakoner ustalǵan
TARAZ. QazAqparat – Jambyl oblysynda ótken jyly zańsyz ań aýlaýǵa qatysty 60 derek tirkelse, aǵymdaǵy jyldyń 8 aıynda 25 brakoner ustalǵan, dep habarlaıdy QazAqparat.
Qoryqshylar sońǵy jyldary brakonerlerdiń azaıǵanyn aıtady. Degenmen, áli de bolsa ońaı oljaǵa kenelgisi keletinder jetkilikti. Máselen, ótken jyly zańsyz ań aýlaýǵa qatysty 60 derek tirkelse, sońǵy 8 aıda 25 brakoner anyqtalǵan. Bul oraıda orman sharýashylyǵy jáne janýarlar dúnıesi aýmaqtyq ınspektsııa qyzmetkerleri qaskóılermen kúres júrgizýdegi birqatar túıindi máselelerdiń barlyǵyn aıtady.
«Atady da, kólikterimen qashyp ketedi. Artynan qýyp toqtatýǵa bizdiń quqymyz joq. Ses kórsetedi. Myltyqpen qorqytatyn jaǵdaılar oryn alady. Óıtkeni bizdiń quqyqtarymyz naqty qaralmaǵan. Memlekettik qarýdy paıdalaný jóninde ańshylyq alqapta bolsyn, basqa jerde bolsyn, brakonerlerdi kez kelgen ýaqytta toqtatý máselesi quqyq qorǵaý organdary sekildi sáıkestendirilse jumysymyz jemisti bolar edi»,- deıdi oblystyq orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Nurǵalı Nııazqulov.
Jalpy Jambyl oblysynda ań-qustyń 17 túrin aýlaýǵa ruqsat bar. Olardyń joıylyp ketpeýi úshin aımaqta keshendi sharalar jospary bekitildi. Endi qoryqshylar brakonerlerge qatysty zańnyń qatańdatylýyn kútip otyr.
Aıta keteıik, elimiz boıynsha ashylǵan ań aýlaýdyń jańa maýsymynan bastap Jambyl oblysyndaǵy ań sharýashylyqtary qorshaǵan ortany qorǵaýda ózgeshe tásilge kóship otyr.
«Mundaǵy maqsat – sońǵy kezde joıylyp bara jatqan qustardy, ańdardy kóbeıtý. Ekinshiden, demalatyn adamdarǵa jaǵdaı jasaý. Ań-qustyń kóp bolǵanyn qamtamasyz etýmen aınalysamyz. Bul brakonerlikpen kúres júrgizýdiń bir joly. Qazir arnaıy tálimbaq qurylyp, munda ıtelgi ósirý jumystary bastaldy. Qanaty qatqan qustardyń 30 paıyzy erkindikke jiberilip otyrady. Aldaǵy ýaqytta sharýashylyq ózge de ań-qus túrlerin ósirýdi qolǵa almaqshy. Al, jetilgennen keıin ańshylarǵa ruqsat tek joldamamen beriledi», - deıdi «Jaılaýkól» ań sharýashylyǵynyń dırektory Erkin Ospanov.
«Jaılaýkól» - Jambyl oblysyndaǵy aýmaǵy jaǵynan eń úlken sharýashylyq. 210 myń gektardan astam jerdi alyp jatyr. Ań aýlaý maýsymy bastalǵaly sharýashylyqtaǵy 22 maman qorshaǵan ortany qorǵaýǵa bar kúshterin salýda. Sharýashylyq basshysy aıtqandaı, munda ań-qusty qorǵap ǵana qoımaı, kóbeıtý máselesi de myqtap qolǵa alynǵan.
