Jambyl oblysynda jyl basynan beri 121 kólik apaty oryn alǵan
Jambyl oblysy polıtsııa departamentiniń qyzmetkerleri jedel járdem medıtsınalyq qyzmetiniń qyzmetkerlerimen birlesip, 1-31 shilde aralyǵynda jol qaýipsizdiginiń aldyn alý boıynsha reıdtik is-sharalar júrgizýdi bastady.
Avtomagıstral arqyly ótetin kólikterdi toqtata otyryp, polıtseıler júrgizýshilerge is-sharanyń maqsaty týraly aıtyp, azamattarǵa jol qozǵalysy erejelerin saqtaý qajettiligi, belgilengen qozǵalys jyldamdyǵy, kólik rýline otyrar aldynda demalý qajettiligi týraly eskertýde. Al jedel járdem brıgadasynyń qyzmetkerleri tynys alý kórsetkishin, qysymdy ólsheıdi, medıtsınalyq kómek qobdıshalaryn tekseredi. Qajet bolǵan jaǵdaıda dáriger medıtsınalyq kómek te kórsetedi.
«Alys jolǵa shyǵýdy josparlap otyrǵan júrgizýshilerge eń aldymen uzaq jolǵa shyǵar aldynda jaqsylap tynyǵý qajettigin eskertemiz. Shamadan tys sharshaý sergektikti tómendetedi, reaktsııalar nasharlap, baıaýlaıdy. Jalpyǵa birdeı qabyldanǵan qaǵıdalardy ustanbaıtyn azamattar jol qozǵalysynyń barlyq qatysýshylaryna qaýip tóndiredi», – dedi oblystyq polıtsııa departamenti jergilikti polıtsııa qyzmeti basqarmasy bastyǵynyń mindetin atqarýshy polıtsııa podpolkovnıgi Manas Ábdikárimov.
Buǵan deıin Tarazda jalǵan nómirmen júrgen kólik júrgizýshisi ustalǵanyn jazǵan bolatynbyz.