Jambyl oblysynda jyl basynan 77 kólik otqa oranǵan
TARAZ. QazAqparat – Jambyl oblysynda aǵymdaǵy jyldyń basynan beri 77 avtokólik órtke oranǵan, dep habarlaıdy QazAqparat tilshisi.
Oblys aýmaǵynda avtokóliktegi órt oqıǵalary artyp kele jatqanyn habarlaǵan Tótenshe jaǵdaılar departamentiniń mamandary onyń shyǵý sebepteri ártúrli ekenin aıtady.
«Aǵymdaǵy jylǵy 26 shildede Baızaq aýdany Sarykemer aýyly Medeýlov kóshesiniń boıynda «KamAz» júk kóligi órtendi. Sol kúni Jýaly aýdany «Almaty-Tashkent» respýblıkalyq mańyzy bar avtokólik jolynyń 581-shaqyrymynda «Mercedes» markaly júk tasymaldaıtyn kólik otqa orandy. Al kelesi kúni Merki aýdany Merki aýyly T.Bokın kóshesiniń boıynda 1990 jyly shyqqan «Mercedes-benz E230» avtokóliginen ot tutandy», - deıdi oblys boıynsha Tótenshe jaǵdaılar departamenti basqarmasynyń bas mamany, azamattyq qorǵaý podpolkovnıgi Baýyrjan Seıdalıev.
Sondaı-aq, B.Seıdalıev órtterdiń shyǵý sebepteri kólikterdi paıdalaný ýaqyttarymen tikeleı baılanysty bolyp otyrǵanyn jetkizdi. Onyń aıtýynsha, kóbine eski, paıdalaný ýaqyty on jyldan asqan mashınalardan jıi ot shyǵady.
«Avtokólik ıeleri kapot astyna jıirek qaraǵandary durys. Tutanýdyń negizgi sebepteri, tamǵan maıdan nemese tosoldan bolýy múmkin. Aqqan maı tamshysy, ystyq qozǵaltqysh júıelerine tıip, benzın býynyń lap ete qalýy ábden múmkin. Maı tamshysynyń áserinen de oryn alǵan oqıǵalar az emes»,- degen ol, turǵyndar men júrgizýshelerdi abaı bolýǵa, barynsha kólikterin qadaǵalap turýǵa shaqyrady.
