Jambyl oblysynda jyl basynan 340 órt oqıǵasy oryn alǵan
TARAZ. QazAqparat – Jambyl oblysy aýmaǵynda jyl basynan beri 340 órt oqıǵasy oryn alǵan, dep habarlaıdy QazAqparat tilshisi.
Jambylda osy jyldyń 7 aıynda 340 órt deregi tirkelgen. Keleńsiz jaǵdaı saldarynan 14 adam qaza taýyp, 5 adam jaraqat aldy. Materıaldyq shyǵyn 17 mln 331 myń teńgeni qurady.
Bul týraly óńirlik kommýnıkatsııalar qyzmeti alańynda ótken brıfıngide Jambyl oblysy TJD memlekettik órt baqylaý basqarmasynyń basshysy Maqsat Ákimbaev málim etti. Onyń aıtýynsha, óńirdegi órt jaǵdaılary 2020 jylmen salystyrǵanda 5 paıyzǵa, al órtterde adamdardyń qaza bolýy 3,5 esege ulǵaıǵan.
«Órtterdiń basym kópshiligi turǵyn úı sektorynda, avtokólik quraldarynda jáne ashyq aýmaqtarda bolady. Órttiń 61 paıyzy nemese 210 jaǵdaıy turǵyn úı sektoryna, 20 paıyzy nemese 69 órt deregi kólik quraldaryna tıesili», - dedi M.Ákimbaev.
Atalǵan basqarma basshysynyń aıtýynsha, oblysta turmystyq órtterdiń jáne ýly gazben ýlaný jaǵdaılarynyń aldyn alý máselesi boıynsha josparly jumystar atqarylýda. Ol turaqty túrde oblystyq tótenshe jaǵdaılardy aldyn alý jáne joıý jónindegi komıssııanyń otyrysynda qaralyp keledi.
«Az qamtylǵan otbasylaryna elektr júıeleri men jylytý peshterin jóndeý, turǵyn úılerde ýly gazdy anyqtaıtyn avtonomdy datchıkterin ornatý sharalaryna erekshe nazar aýdarylyp, turaqty baqylaýǵa alyndy», - dedi spıker.
