Jambyl oblysynda jumysynan zańsyz bosatylǵan memqyzmetshilerdiń quqyǵy qorǵaldy

TARAZ. QazAqparat - Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi Jambyl oblysy boıynsha departamentiniń ókilderi memlekettik qyzmetshilerdiń quqyǵyn qalaı qorǵaıtynyn aıtyp berdi, dep habarlaıdy QazAqparat tilshisi.

«Memlekettik qyzmetshilerdiń arasynda departament jazalaýshy organdardyń qataryna jatady degen burys pikir qalyptasqan. Departamenttiń basty mindetteriniń biri - azamattardyń, sonyń ishinde memlekettik qyzmetshilerdiń de quqyǵyn qorǵaý. Ókinishke qaraı, memlekettik qyzmetshilerdiń ózderi de «jábirlenýshige» aınalady», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttigi óńirlik departamentiniń basshysy Maqsut Nálibaev.

Onyń aıtýynsha, 2017 jyly memlekettik qyzmet salasyndaǵy baqylaý basqarmasy 194 ótinishti qaraǵan bolsa, sonyń 175-i jeke tulǵalarǵa tıesili, ótinishterdiń 22-si zańdy tulǵalardan kelgen. 11 ótinish boıynsha jospardan tys tekseris júrgizilip, alty azamattyń quqyǵy qorǵalǵan, sonyń tórteýi memlekettik qyzmette jumys isteıdi. Olardyń arasynda jumysynan negizsiz qýylǵan Baızaq aýdandyq sotynyń bas mamany K. Tilemisova da bar.

«Jospardan tys tekseris kezinde memlekettik qyzmetshiniń jumysynan bosatylýy negizsiz ekeni dáleldenip, burynǵy qyzmetine qaıta ornalastyryldy», - deıdi Maqsut Nálibaev.

M. Nálibaevtyń aıtýynsha, odan tys sot ákimshiliginiń qyzmetshilerdi basqarý bóliminiń bas mamany Sh. Aıtbaeva, Talas aýdany ákimini apparatynyń bilim bóliminiń bas mamany A. Tápelova, taǵy basqalarǵa qatysty negizsiz qyzmettik jazalar qoldanylǵany anyqtalyp, ereje buzǵandar jaýapqa tartylǵan.