Jambyl oblysynda joldy durys kútip ustamady degen sebepen 250 laýazym ıesi jaýapqa tartyldy
Bul týraly Jambyl oblystyq Polıtsııa departamentiniń Instagaram paraqshasynan málim boldy. Departamenttiń baspasóz qyzmeti áleýmettik jelige bıylǵy 9 aıda jol sapasyna baılanysty júrgizilgen tekserýlerdiń nátıjesin jarııalady.
Ondaǵy derekterge qaraǵanda 9 aıda jol-tehnıkalyq ınspektsııa qyzmetkerleri uzyndyǵy 13 myń shaqyrymnan asatyn jalpyǵa ortaq avtojoldarǵa 1782 tekserý júrgizgen. Tekserý barysynda 11602 kemshilik anyqtalyp, jol sapasyna jaýapty uıym basshylaryna jáne jergilikti atqarýshy organdarǵa anyqtalǵan kemshilikterdi joıý maqsatynda 1782 nusqama jiberildi.
Jambyl oblysy Polıtsııa departamenti Ákimshilik polıtsııa basqarmasynyń bastyǵy polıtsııa podpolkovnıgi Jaıdarbek Quttybaevtyń aıtýynsha, jol sapasyna jaýapty 250 laýazymdy tulǵa ákimshilik jaýapqa tartyldy. Olar avtomobıl joldarynyń jaǵdaıyna kóńil bólmegen, ıaǵnı jol qaýipsizdigin qamtamasyz etpegen.
Budan basqa, Turar Rysqulov jáne Shý aýdandarynyń polıtsııa bólimi, sondaı-aq Taraz qalasynyń polıtsııa basqarmasy bergen nusqamalardy oryndamaǵany úshin QR ÁQBtK 3-bóliminiń 462-babyna sáıkes, aýdannyń avtojoldaryn kútip ustaýǵa jaýapty laýazymdy tulǵalar ákimshilik jaýapqa tartyldy.
Ótken kezeń ishinde avtomobıl joldarymen qıylysatyn barlyq 73 temirjol ótkelderi tekserýden ótti. Tekserý barysynda olardyń quramyndaǵy 205 aqaý anyqtaldy.
Ótkelderge qyzmet kórsetetin uıymdardyń basshylaryna kemshilikterdi joıý úshin 68 nusqama berildi. Temirjol ótkelderin qanaǵattanarlyqsyz ustaǵany jáne jol qozǵalysy qaýipsizdigin qamtamasyz etpegeni úshin 20 laýazym ıesi ákimshilik jaýapqa tartyldy.
«Sonymen qatar, jergilikti atqarýshy organdarǵa jol qozǵalysyn uıymdastyrýdy jaqsartý, ıaǵnı baǵdarshamdardy ornatý, jerústi jaıaý júrginshiler ótkelderin, avtoturaqtar men kireberisterdi salý boıynsha usynystary bar aqparattyq hattar joldandy»,-delingen habarlamada.