Jambyl oblysynda jolda júk kóligi túgeldeı órtenip ketti
TARAZ. QazAqparat – Jambyl oblysynda Almaty-Tashkent jolynda júk kóligi órtenip ketti, dep habarlaıdy QazAqparat tilshisi.
13 qarasha kúni túngi saǵat 2 men 3 aralyǵynda Baızaq aýdanynyń Almaty-Tashkent aınalmaly tas jolynyń №486 shaqyrymynda 2005 jyly shyqqan, júk avtokóligi órtengen. Nebári 15 mınýttyń ishinde kólik tolyǵymen janyp ketken. Bul týraly oblystyq tótenshe jaǵdaılar departamentiniń baspasóz qyzmeti habarlady. Sondaı-aq, vedomstvo óńirdegi táýlik ishinde oryn alǵan órt oqıǵalary týraly málimdedi.
«Oblys ortalyǵy – Taraz qalasyndaǵy «Asa» shaǵyn aýdandaǵy kópqabatty turǵynúıdiń páteriniń birinde órt oqıǵasy oryn alǵan. Ot jaýyngerleri páterdegi órtti nebári 14 mınýtta aýyzdyqtaǵan, sondaı-aq oqıǵa ornynan 15 adamdy qaýipsiz orynǵa kóshirgen. Onyń ishinde 4-ýi bala.
Budan bólek, qaladaǵy «Baılyq» JShS plastık óńdeıtin tseh órtengen. Atalǵan órt oqıǵasyna órt sóndirý bólimderinen 6 órt sóndirý avtokóligi men 1 avtosaty, jeke quramnyń 30 adamy jumyldyryldy. 150 sharshy metr aýmaqty quraǵan órt jarty saǵatta sóndirilgen», - delingen baspasóz qyzmetiniń habarlamasynda.
Atalǵan órt oqıǵalarynan eshkim zardap shekpedi. Órttiń shyǵý sebepteri men órtten keltirilgen materıaldyq shyǵyn anyqtalýda. Departament mamandary oblys jáne qala turǵyndaryn órt qaýipsizdigi erejelerin qatań saqtaýǵa shaqyrady.
