Jambyl oblysynda jolda qaıtys bolǵandar sany ósip, polıtsııa erekshe tásil qoldanýǵa kóshti
NUR-SULTAN. QazAqparat – Statıstıka boıynsha Jambyl oblysynyń joldarynda qaza tapqandardyń sany byltyrǵy jylmen salystyrǵanda ósken, dep habarlaıdy QazAqparat Jambyl oblystyq Polıtsııa departamentiniń málimetterine silteme jasap.
Departamenttiń Facebook jelisi arqyly taratqan derekterine qaraǵanda, qaıǵyly jaǵdaılardyń basym kópshiligi respýblıkalyq tas joldarda, sonyń ishinde halyqaralyq «Batys Eýropa-Batys Qytaı» avtomagıstralinde bolady.
«Taqtaıdaı tegis joldyń kólik úshin óte yńǵaıly ekeni belgili. Alaıda ádemi jolmen júıtkigen júrgizýshiler qaýipsizdik máselesin esten shyǵaryp alady. Al onyń arty qaıǵyly jaǵdaılarǵa dýshar etedi. Sondaı-aq tegis jol júrgizýshini maýjyratyp, jolda qalǵyp ketý yqtımaldylyǵyn arttyrady. Onyń da sońy nemen aıaqtalatyny belgili»,-dep jazady jelide departamenttiń baspasóz qyzmeti.
Osy oraıda Jambyl oblystyq Polıtsııa departamentiniń basshysy, polıtsııa polkovnıgi Arman Orazalıevtiń bastamasymen respýblıkada alǵash ret «Shokovaıa terapııa» atty aktsııa uıymdastyrylýda. 20 tamyzdan bastap «Batys Eýropa-Batys Qytaı» tas jolynda apatqa ushyraǵan kólikti tıegen qyzmettik evakýator júr. Ony kórgen júrgizýshiler kez kelgen júrgizýshiniń dál osyndaı jaǵdaıǵa tap bolýy múmkin ekendigin oılap, jyldamdyqty azaıtady degen úmit bar.
«Evakýator alǵashqy kúni beton tóselgen jolmen Shymkentke qaraı júrdi. Kelesi kúni T.Rysqulov aýdanyna qaraı jol tartty. Halyqaralyq «Batys Eýropa-Batys Qytaı» magıstraliniń júrgizýshilerine arnalǵan aktsııa áli de jalǵasýda»,-dep habarlaıdy departament ókilderi.
