Jambyl oblysynda jolda qalǵan 30-ǵa jýyq jolaýshy qutqaryldy
TARAZ. QazAqparat – Jambyl oblysy Jýaly aýdany aýmaǵynda qar qursaýynda qalǵan 30-ǵa jýyq jolaýshy qutqaryldy, dep habarlaıdy QazAqparat tilshisi.
Jambyl oblysynda qolaısyz aýa raıyna baılanysty jolda qalǵandarǵa kómek kórsetý boıynsha jumystar júrgizilýde. Aıtalyq, Jýaly aýdanynyń aýmaǵynda 29 adam qutqarylsa, al, Aısha bıbi blogynan 64 adam temirjol stantsııasyna jetkizildi.
Oqıǵa oryndarynda oblystyq TJ departamentinen 17 qyzmetker jumys jasaýda. 7 tehnıka jumyldyrylǵan. Sondaı-aq, avtojoldardy tazalaý úshin «Qazavtojol» JShS - nen 11 tehnıka jáne 15 adam tartylǵan.
Aıta keteıik, aǵymdaǵy jyldyń 25 aqpanynda saǵat 01-20-da Jýaly aýdany, aýa raıynyń nasharlaýyna baılanysty «Almaty-Termez-Tashkent» respýblıkalyq mańyzy bar avtojol ýchaskesinde Aısha bıbi aýylynan Túrkistan oblysynyń shekarasyna deıin barlyq avtokólik túrleriniń qozǵalysyna shekteý qoıylǵan. Bul týraly oblystyq tótenshe jaǵdaılar departamenti habarlady.
«Qazirgi ýaqytta Aısha-bıbi aýylynda avtokólikterdiń jınalýy baıqalady. Onda 120 júk kóligi, 22 jolaýshylar avtobýsy jáne 80-nen astam jeńil avtomobıl toqtap tur desek, olarda 739 jolaýshy, onyń ishinde 77 bala bar ekendigi belgili boldy. Taraz qalasynan qashyqtyq 14 shaqyrymdy quraıdy, barlyq júrgizýshilerdiń Taraz qalasyna oralý múmkindigi bar»,- delingen vedomstvo habarlamasynda.
Blok bekette, avtokólik jınalatyn jerde «Apattar medıtsınasy ortalyǵy» fılıaly mamandarynyń kezekshiligi qolǵa alynǵan. Jýaly jáne Jambyl aýdandarynda 5 jylytý pýnkti daıyndalǵan. Jergilikti jerde ystyq tamaq uıymdastyrylýda.
