Jambyl oblysynda jol apatynyń sany 17,4 paıyzǵa artty
TARAZ. QazAqparat – Jambyl oblysynda jol-kólik oqıǵalarynyń sany 17,4 paıyzǵa kóbeıdi, dep habarlaıdy QazAqparat tilshisi.
Jambyl oblysypolıtsııa departamentiniń bastyǵy Janat Súleımenov oblystyq polıtsııa departamentinde «Nurline» kompanııasynyń ókilderimen kezdesý ótkizdi.
Kezdesýge oblys ákimdiginiń jolaýshylar kóligi jáne avtomobıl joldary basqarmasynyń basshysy Baqytjan Jánibekov, «QazAvtoJol» UK» AQ oblystyq fılıaly dırektorynyń orynbasary Dáýren Tóltaev qatysty.
«Nurline» kompanııasynyń ókilderi jol qozǵalysy erejelerin buzýdy beınetirkeý júıesiniń tusaýkeserin ótkizdi.
Janat Súleımenov mundaı júıelerdi ornatý jol qozǵalysyna qatysýshylardyń tártibin jaqsartýǵa, óńirdegi apattylyq kórsetkishterin tómendetýge múmkindik beretinin atap ótti.
«Bul másele bizdiń óńir úshin ózekti, óıtkeni oblys aýmaǵy arqyly «Batys Eýropa – Batys Qytaı» tasjoly ótedi, ol arqyly ondaǵan myń tranzıttik avtokólikter júredi», – dedi Janat Súleımenov.
Statıstıka kórsetkendeı, kóptegen apattardyń sebebi - adamı faktor. Máselen, aǵymdaǵy jyldyń bes aıynda oblysta jol apatynyń sany 17,4 paıyzǵa kóbeıdi.
Onyń ishinde júrgizýshilerdiń kinásinen bolǵan jol-kólik oqıǵalarynyń sany 15,7 paıyzǵa, al tranzıttik kólik júrgizýshileriniń qatysýymen 74,4 paıyzǵa artqan.
«Bul baǵytta jambyldyq polıtseıler profılaktıkalyq jumysty kúsheıtti. Sondaı-aq taldaý júrgizilip, jol qozǵalysyn qadaǵalaýdy júzege asyrýǵa múmkindik beretin aqparattyq tehnologııalardy engizý arqyly máseleni sheshýdiń túrli ádisteri qaraldy», – dep atap ótti Janat Súleımenov.
