Jambyl oblysynda joǵalyp ketken 15 jastaǵy qyz 3 kúnnen soń tabyldy
TARAZ. QazAqparat – Jambyl oblystyq Polıtsııa departamentiniń polıtsııa qyzmetkerleri joǵalyp ketken 15 jastaǵy jasóspirim qyzdy tapty,- dep habarlaıdy QazAqparat.
Eske sala keteıik, osydan úsh kún buryn T.Rysqulov aýdany Qulan aýylyndaǵy 15 jasar qyzdyń úıinen tańerteń belgisiz baǵytta shyǵyp ketip, qaıta oralmaǵandyǵy týraly habarlanǵan bolatyn. Jasóspirimniń aqyl-oıy artta qalǵan jáne úıden oqytylatyn bolǵan.
Polıtsııa qyzmetkerleri balany izdeý boıynsha dereý sharalar qabyldap, oǵan eriktiler de jumyldyrylǵan. Olar qyzdy 3 kún boıy izdegen.
Aýyl jáne jaqyn aýdandardyń turǵyndary arasynda saýalnama alynyp, jasóspirimniń qurdastarymen jáne synyptastarymen áńgime júrgizilgen. T.Rysqulov aýdandyq polıtsııa bóliminde joǵalyp ketken qyzǵa qatysty sotqa deıingi tergeý bastalǵan. Qabyldanǵan sharalar nátıjesinde qyz Jambyl aýdany Aısha bıbi aýylynan tabyldy.
Balanyń aıtýynsha, ol ájesine renjip, Taraz qalasyndaǵy ápkelerine barǵan. Janjaldan keıin boıjetken vokzal aımaǵyna baryp, ótip bara jatqan kólikterden ony qalaǵa jetkizýin ótingen. Tarazǵa jetkende ápkeleriniń úıinde joq ekenine kóz jetkizgen. Áleýmettik jeli arqyly tanysyna habarlasyp, Jambyl oblysynyń Aısha bıbi aýylyna baryp, sonda 3 kún turaqtaǵan. Ony polıtsııa qyzmetkerleri taýyp, ata-anasyna jetkizdi.
«Búginde joǵalyp tabylǵan jasóspirimniń ómiri men densaýlyǵyna eshqandaı qaýip tónip turǵan joq»,-delingen habarlamada.
