Jambyl oblysynda jeńil kólik malshyny atymen jáne qoılarymen qosa qaǵyp ketti
TARAZ. QazAqparat – Jambyl oblysynda «Batys Eýropa-Batys Qytaı» tasjolynda eki kólik pen bir otar qoı jol apatyna ushyrady, dep habarlaıdy QazAqparat tilshisi.
Jambyl oblystyq polıtsııa departamenti baspasóz qyzmetiniń habarlaýynsha, 31 qańtarda Rysqulov aýdanynda, «Batys Qytaı – Batys Eýropa» tasjolynyń 436 shaqyrymynda «Volkswagen Passat» kóliginiń 48 jastaǵy júrgizýshisi bir qora qoıyn joldan ótkizip bara jatqan 47 jastaǵy malshyny qaǵyp ketti.
Sol kezde osy baǵytpen kele jatqan 33 jastaǵy júrgizýshi baqsaryp kele jatqan «KamAZ-5410» júk kóligi «Volkswagen Passat» kóliginiń artyna kirip ketti. Jol-kólik oqıǵasy saldarynan №1 Taraz qalalyq aýrýhanasyna júrgizýshi men malshy túrli jaraqatpen jetkizildi. 30 qoı men malshynyń jylqysy kólik astyna tústi», - dep túsindirdi vedomstvodan.
Atalǵan fakti boıynsha QR Ákimshilik quqyq buzýshylyq týraly kodekstiń 610-baby 2-bóligi «Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy» boıynsha ákimshilik hattama toltyryldy. Birqatar sot-medıtsınalyq saraptama taǵaıyndaldy. Sonyń nátıjesi boıynsha sáıkes sheshim qabyldanady, dep habarlady Jambyl oblystyq polıtsııa departamentiniń baspasóz qyzmetinen.
