Jambyl oblysynda jemqorlyqpen kúres forýmy ótti
TARAZ. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń qyzmetkerleri bilim basqarmalarynyń basshylarymen birigip, oblystyń barlyq oqý oryndarynda jemqorlyqpen kúres kúnine arnap, tártip saǵattaryn ótkizdi. Bul týraly oblystyq ishki saıasat basqarmasynan habarlandy.
9 jeltoqsan kúni búkil álemde BUU Bas Assambleıasy kótergen Halyqaralyq sybaılas jemqorlyqpen kúres kúni atalyp ótedi. Ataýly kúnge oraı aımaqta 10 myńnan astam jemqorlyqpen kúreske shaqyratyn paraqshalar taratylyp, «Sybaılas jemqorlyqsyz el - órkendeýshi el» atty forým ótti.
Sybaılas jemqorlyq qoǵam damýynyń negizgi tejegishi. Bıylǵy jyly jeń ushynan jalǵasýdyń aldyn-alý maqsatynda 650-ge jýyq is-sharalar ótkizilip, oǵan 70 myńnan asa turǵyndar qatysty. El bolashaǵy tárbıeli,bilimdi jastardyń qolynda. Sondyqtan búgingi ótkizilgen forýmǵa oblys ákiminiń orynbasary , QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basshylary jáne «Nur Otandyqtar» jáne bilim berý mekemeleriniń basshylary men qyzmetkerleri qatysty. Basqosýda jaýapty sala mamandary jyl boıy atqarǵan jumystaryn baıandady. Sonymen qatar , forýmǵa qatysýshylardyń nazaryna arnaıy daıyndalǵan beınerolıkter usynyldy.
Forýmda Jambyl oblysy ákiminiń orynbasary Erqanat Mánjýov el Prezıdentiniń basshylyǵymen sybaılas jemqorlyqtyń deńgeıin tómendetý baǵytynda júzege asyrylyp jatqan reformalardyń mańyzdylyǵy týraly kirispe sóz sóıledi.
«Turmystyq sybaılas jemqorlyq azaıdy. Eń bastysy memlekettik kórsetiletin qyzmetterdi elektrondy túrde aýystyrýdyń arqasyndaúSonymen qatar, barlyq qyzmet kórsetý ortalyqtarynda vıdeorolıkter qoıylǵan», - dep atap ótti QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha Departamenti basshysynyń orynbasary Dáýren Kaıpov.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń jetekshisi Maqsut Nálibaev óńirdegi jemqorlyqpen kúres baǵytynda atqarylyp jatqan jumystardyń barysymen tanystyrdy. Sondaı-aq onda jemqorlyqpen kúres barysynda anyqtalǵan naqty faktiler týraly da aıtyldy.
